Shillong, Nohprah 10: Ban wanrah ia ka jingiajan ha pdeng ki pulit bad ki paidbah ha ka thain South Garo Hills, la pynlong ia ka Civic Action Programme kaba lai sngi lynter ha Mindigre ka shong jong u C-In-C jong ka seng lehnoh ASAK. Ha kane ka CAP da ki spah ngut ki samla kila wan ban ia shim bynta ha ka jingialehkai Volly Ball.
Ia kane ka jingialehkai la pynlong da ka jingiatreilang ki seng bhalang na kane ka shnong bad ka thong hi ka long ban wanrah ia ka jingiasngewjan hapdeng ki bor jong ka ain khamtam ki pulit bad ki paidbah ha kaba u SP jong kane ka jaka u Anand Mishra u la ia shim bynta ha ki jingialehkai.
Ha kine ki jingialehkai la pynsngewthuh ruh ia ki samla ba kim dei ban shah ialam bakla ha ki nongialam jong ki seng lehnoh kiba long pyrshah ia ka ain, kane ka shnong Mindigre ka dei ka shnong jong u C-In-C jong ka seng lehnoh ASAK u Reading T Sangma.
Ban ai jingshngian ia ki paidbah ha katei ka thain na ka liang jong ki pulit kila buh ruh ia ka ktem pulit hapoh Mindigre ka jaka kaba la shah jur shisha na ka daw jong ki kam lehnoh. Kane ka jingleh baroh ka long ban wanrah ia ka jingiadei ha pdeng ki pulit bad ki paidbah kum ka jingiakhun pyrshah ia ki kam lehnoh.
