Shillong, Iaiong 10: Mynta u snem kiba la poi sha ka Shad Suk Myniem ha Madan Weikinng ha ka sngi kut ki long 1428 ngut, ki shynrang ki long 715 ngut bad ki kynthei ki long 713 ngut bad kane ka dei ka sien kaba nyngkong kaba ki nongshad kila poi haduh katei ngut.
Mynta u snem u Lat ka jylla u Phagu Chauhan u la leit ban sakhi lang ia kane ka shad Suk Mynsiem kaba dei ka shad tynrai u khasi, u Symbut Myntri Rangbah ka jylla u bah Prestone Tynsong, u Chief Executive Member jong ka KHADC u bah Tistosstarwell Chyne kila don lang ban sakhi ia ka shad Suk Mynsiem ha Madan Weiking.
Ha kane ka sngi palat lak ngut ki paidbah na kylleng ka Ri Khasi Jaintia kiba la ia poi sha kane ka shad ban sakhilang ia kane ka shad suk mynsiem kaba la pynlong manla u snem ha Madan Weiking ia kaba la pynlong da ka Seng Khasi Kmie Mawkhar.
Kane ka shad Suk Mynsiem ka long ban ai nguh ia u nongbuh nongthaw ha dien ba la dep ban lum balang kiba mih na ka rep ka riang bad ha ka juh ka por ka dei ka jingsdang kaba thymmai ban thung ban tep, kane ka long ban kyrpad ia u nongbuh nongthaw ban kyrkhu kyrdoh ia ka rep ka riang.
Mynta u snem ka shad Suk Mynsiem kaba lai kala sdang da ka jingnoh kjat ha ka 8/4/2023 bad ka bud ka jingshad ka sngi kaba ar bad mynta ka sngi ka dei ka sngi kut, ha kaba ki para kur para kha na jan bad na jngai kila ia wan ban ia shim bynta ha kane ka shad ka kmen bad ban sakhi lang ruh ia kane ka shad tynrai u khasi.
