Jowai, Jylliew 11: Ka Bharatiya Janata Party (BJP) Meghalaya ha ka 10 tarik u Jylliew, ka la rakhe ia ka jingdap lai snem ka jingsynshar ka sorkar pdeng ba la tip kum ka National Democratic Alliance (NDA) ba lam khmat da ka BJP bad u Narendra Modi kum u Myntri Rangbahduh ha ryngkat ka jingiatreilang bad jingkyrshan tyngka ka North-Eastern Electric Power Corporation Limited (NEEPCO) kaba dei kawei na ka Public Sector Unit (PSU) ha ka jylla Meghalaya.
Ia kane prokram la pyniaid da ka da ka West Jaintia Hills District BJP Mandal ha kaba la pynrung dkhot pura ruh ia u MLA barim ka War Jaintia u Bah Riang Lennon Tariang u ba la long teng u MLA na kane ka jaka 1998-2008 bad u la mih noh na ka UDP ha u snem 2016 hadien ba ka UDP ka la weng ia ka kyrteng jong u na ka Council Executive Committee.
Ha kane ka jingrakhe dap lai snem jong ka sorkar NDA, kiba la wan ban ia donlang ki kynthup ia u Bhabesh Kalita u ba dei u MLA ka Rangira Constituency (Government of Assam) u ba la wan ban shim ia ka bynta kum u Kongsan , u Bah Shibun Lyngdoh u ba dei u President ka BJP Meghalaya, u KC Boro u ba dei u MLA barim ka Tikrikila Constituency na North Garo Hills, u Bah RL Tariang u ba la pyniasnoh pura bad ka BJP ha kane ka sngi, u Ma Sing Mulieh MLA barim, u ba dei u President ka West Jaintia Hills District BJP Mandal, ka Kong Victoria Lyngdoh kaba dei ka MDC ha JHADC, u Bah Egenstar Kurakalang u ba dei u President ka State Youth Wing ka BJP.
Ia kane ka Prokram ba tip ruh kum ka ‘Sabka Saath Sabka Vikaas Sammelan’ ka long shi bynta ban pyni paidbah ruh ia ki kam kiba ka Sorkar NDA hapoh ka jinglam khmat u Narendra Modi ka la leh ha ki lai snem naduh ba ka la bat ia ka bor synshar. Ia kane ka prokram la bei tyngka ruh da ka NEEPCO. Ha kane ka sngi ha kane ka Programme ba la pynlong ha Amlarem Community Hall la pyni ruh ia ki jingshad tynrai jong ki Nong War Jaintia da ki samla na ki shnong bapher bapher jong ka thain. Ha kane sngi la pynkup burom ruh ia ka samla Sakani Tariang kaba la wan ha ka kyrdan ba hynriew jong ka Exam SSLC 2017. Ha kane ka sngi na ka liang ka NEEPCO ka la pyni paidbah ruh lyngba ka LED ia ki kam kiba ka sorkar NDA ka la leh kum ka jingai Gas shet jingshet ia kiba duk, ka jinghiar thma kynsan da ki shipai ka ri India ha ki bynta khappud ban pyntroin ia ki lehnoh na Pakistan, ka jingpynduh ia ki pisa kot 500 bad 1000, ka jingiarap ia ki ba anna, ka rep ka riang, ka Swaach Bharat Mission bad kiwei kiwei.
U Bah Shibun Lyngdoh President ka Meghalaya BJP u la ong kane ka jingrakhe ka pyni ruh ia ki kam kiba ka sorkar hapoh ka jingialam u Myntri Rangbahduh ka ri India u Narendra Modi ha kaba la pyntrei kam bun tylli ki skhim ban iarap ia ki paidbah. U la pynpaw ha kane ka jingialang bad ki nongthoh khubor ha ka jingiadonlang u Bhavesh Kalita, MLA na Assam kumjuh u Ma Makri Mulieh, President ka West Jaintia Hills District Mandal ba ia kane ka programme la bei tyngka da ka NEEPCO kaba dei ka PSU, Govt of India. “Ka Sorkar pdeng lyngba ka BJP Meghalaya ka bthah ban rakhe ia ka jingdap lai snem ka sorkar NDA ha kylleng ki District ban pyni ia ki kam kiba ka sorkar ka la leh ha ki lai snem ba la dep”, la ong u Bah Shibun u ba la ong ruh ba ka sorkar NDA ka la pyntrei kam bun tylli ki skhim ban kyntiew ia ki paidbah ha ka jylla.
“Kane ka programme ka long ban pynshai paidbah ba kum kino ki skhim la dep ban pynpoi sha ki paidbah bad kane ka programme kan long sa ha East Jaintia Hills District ha ka 17 tarik u Jylliew da ka jingbei tyngka jong ka BSNL”, la ong shuh shuh u Bah Shibun Lyngdoh u ba la iathuh ba ka Party ka la dep sdang ha Garo hills ia kane ka programme kaba la tip kum ka Sabka Saath Sabka Vikaas Sammelan. U Bah Shibun u la iathuh ba ki don lai tylli ki Public Sector Unit ki ba bei tyngka ia kane ka programme kun ka Oil India bad BSNL nalor jong ka NEEPCO. U Bah Shibun u la iathuh ba um don jingtip katno ki PSU ki mang ban pynlut na ka bynta kawei kawei ka programme namar ka jingiakren ka dei bad ka Sorkar Pdeng bad ki PSU ym bad ka Party jong ka Jylla Meghalaya.
