Shillong, Kyllalyngkot 15: Namar ka jinglong jingman jong ka shong suk shongsain hapoh jong ka District, u Superintendent ki pulit jong ka East Khasi Hills District u la pynkynmaw ba ka don ka hukum jong ka iing bishar jong ka High Court jong ka Meghalaya ha kaba ia dei bad ka jingiakhih kum ka pakhang shnong, pakhang surok bad kiwei kiwei ki jingiakhih kiba ktah ia ka hok jong ki paidbah katkum ka riti synshar jong ka Ri hapoh ka Artikle 19 bad 21.
U Heh pulit jong ka East Khasi Hills District u la pynkynmaw ba katkum ka rai jong ka iing bishar jong ka High Cour jong ka Meghalaya, kaba la aid a u nongbishar rangbah ba ha khlieh u Justice Uma Nath Singh, u Justice TNK Singh bad u Jusitce SR Sen, ha ka mukotduma Case No. WP(C) (SH) 127 of 2015 hapoh Registrar General High Court jong ka Meghalaya pyrshah ia ka jylla jong ka Meghalaya, la bethah ia ki lad pathai khubor ban kiar na ka jingpynmih ia ki khubor kiba khot pakhang shnong, pakhang surok, kino kino ki jingialang paidbah kiba don ka jingthmu ban pynklumar shnong kiba la khot da ki seng bala niew beain ne da kano kano ka kynhun seng.
