Shillong, Jylliew 05: Ka myntri kam poh iing ka jylla ka kong Roshan Warjri da lade kala leit ban ia kynduh ia ki paidbah jong ka thain Chokpot na ka bynta ban ai jingshngain ia ki ba ka sorkar ka don ryngkat ban ia khun pyrshah ia ki kam lehnoh ha katei ka District bad haki bynta jong ka garo Hills baroh kawei.
Ha kane ka jingleit sha Garo Hills ka myntri kampoh iing kala leit ban ia kynduh ia ki khun ki kti jong ka long kmie kaba la shah siat ha ki lehnoh ha kine ki sngi. Ha kane ka leit la synran lang ia ka da ki heh sorkar na katei ka District bad ki heh pulit jong ka jylla.
Ha dien ba la ia kynduh ia kiba ha iing ka sem jong ka long kmie kaba la shah siat ha ki lehnoh , ka myntri kala bthah ia ki bor jong ka District ba ki dei ban ai ia ki jingiarap sha kane ka long iing kaba la mad ia kane ka jingjia kaba sngewsih kthang.
Ha Chokpot ka myntri kala khot ia ka jingialang jong ki heh sorkar ban ia kren ha kaba ia dei bad ka jingshong suk shong sain ha katei ka thain, ynda la leitphai sha Tura kala khot ia ka jingialang jong ki heh sorkar ban ia kren kumno ban tehlakam ia ki kam lehnoh ha Garo Hills baroh kawei.
La iathuh ba la phah shuh shuh ia ki kynhun shipai ban iarap ia ki pulit jong ka jylla ban ia khun pyrshah ia ki lehnoh ha Garo Hills.(SP News)
