Shillong, Nailur 01: Ka Labour Department jong ka Sorkar jylla ka la pynkiew ia ka bai bylla sngi ha kine ki bnai ba ladep, bad ka long kaei kaei ka ba sngewtynnad naka bynta ki paidbah ka jylla hi baroh kawei. Hynrei ha ka jingleit jurip jong ka seng ia ki ba bun ki Show room, ki Mall, wat ki ophis trei kam jong ka sorkar jylla ruh, la lap ba kam don ka jingbud tista ia ka Minimum wages bala wanrah thymmai da ka tnat labour department jong ka sorkar jylla, la kynnoh ka KHNAM.
Khnang ba kane ka jingpynkiew ia ka bai bylla sngi da ka sorkar, kan long ka jingmyntoi ba pura ia ki paidbah, ka seng ka kyntu ia ka tnat labour ban bthah ia baroh, ban bud tista ia ka minimum daily wages ba la wanrah da ka sorkar jylla bad ban pyntip paidbah ruh lymba ki lad pathai khubor ia ka dor thymmai ba la buh da ka sorkar naka bynta ka jingia tip lang jong baroh ki nongbylla.
Ka KHNAM ka kyntu ruh ia ki nongbylla ki ba trei ha ki jaka bapher bapher ban wan shakhmat ban ujor lada ki dang ioh ia ka bai bylla ka ba duna na kaba la buh da ka sorkar.
