Shillong, Jymmang 08: Ka Jaiñtia National Council JNC Central Executive Committee lyngba u President Jong ka I bah Sambormi Lyngdoh haka kyrwoh bala pyllait sha ki lad pathai khubor kala Ong ba hadien baka seng ka lah dep ban ai jingthoh sha ki department bapher bapher halor ka jingpynbna Jong ka MSPCB ban pynlong public hearing naka bynta ka mining Jong ka shree cement.
Ka seng hadien baka lah dep aiti iaki mat kiba ka EIA Jong kane ka company ki bym iahap bad ka jylla sha ka pollution control board ,SEIAA Meghalaya, bad MoEF&CC RO Shillong.
Kane ka EIA ka dei jong ka Gujarat, ym jong ka Meghalaya. Ha ka sla 1 jong ka Draft EIA report hi, u nongthoh u la thoh ha ka ktien phareng kaba shai: “Ia ka aplikeshon na ka bynta ka projek ba la tyrwa la bishar ha ka jingialang jong ka SEAC jong ka Gujarat, da kaba pynshong nongrim ha ki jingai jingmut bad jingpyni ba la leh da u trai ka projek ka dei ha SEAC Gujarat & ka SEIAA ka la pynmih ia ka ToR na ka bynta ban pule iaka EIA”.
Ka JNC ka kylli, ryngkat bad ka jingthoh ba pura Kumno ka SEIAA Meghalaya ka lah ban pdiang bad pyntreikam ia ka kot EIA kaba la thoh shai sha kawei ka bor synshar jong ka Gujarat? Naduh mynno ka Sorkar Meghalaya ka pynlong ïa ki jingpynsngew paidbah na ka bynta ka Gujarat? Kane kam dei ka jingkynnoh la thoh shai hi haka report ka shree cement limited.
Ia ka plan jingiada jong ka par mawshun la tei halor ka ain kaba la iap. Ka EIA ka pynbna ba ia ka jaka jong ka projek ka hap hapoh ka Seismic Zone VI da kaba pyndonkam ia ka Indian Standard, hynrei ia kane Ka aiñ ka Bureau of Indian Standards ka la weng noh da kaba pynbna ia kane lyngba ka jingpynbna ba la pynmih ha ka Gazette of India ha ka 3 tarik u March 2026.
Ka Seismic Zone VI ka la sangeh noh ha ka ain jong ka ri India ha katei ka tarik. Ka Shree Cement ka la ai ia kane ka EIA ha ka 07 April 2026, 35 sngi hadien kata ka jingweng noh. Kumno lah ban ailad ia ka kompeni ban pynlong ia ka jingbishar paidbah ha kaba ia ka Disaster Management Plan ban iada ia ka jingim bad ki jaka jong ki briew jong ngi la thoh ha ka ain kaba ka Sorkar India hi ka la dep pyndam noh?
Ka JHADC kam shym la don satia ha baroh kane ka EIA. Ka Jaintia Hills Autonomous District Council kaba bat ia ka bor synshar katkum ka riti synshar halor ka khyndew ka shyiap bad ki marpoh khyndew ha kane ka distrik hapoh ka Khyrnit kaba hynriew jong ka riti synshar ka ri India.
Katba Ka kyrteng jong ka pat kam paw ym ha kano kano ka bynta, Ka buffer zone jong kane ka par mawshun ka long 98.79% Scheduled Tribe population, katkum ka EIA Jong ki hi. Ka JNC ka kylli Kumno ka JHADC ka shu sngap jar? Ka jingsngap jar jar jong ka JHADC ka mut aiu ïa ka hok riti synshar jong kawei pa kawei ka longïing riewlum ha Elaka Nongkhlieh?
Ka HNC ka ioh i ruh baka sorkar Meghalaya, hapoh ka jingpynbor jong ki paidbah, dang shen ka la mynjur ban weng noh ïa ka Lumpongdeng Island na ka projek Taj Resort ba la thmu ha ka pung Umiam.
Ka JNC ka kylli ia kane kajuh ka sorkar Ki paidbah ka Elaka Nongkhlieh, East Jaintia Hills, hato ki kham duna hok ban ioh ia kata kajuh ka jingburom? Kan eh aiu ban weng ia kane ruh?.
Lada ka sorkar ka lah ban pynduh noh ia kawei ka bynta jong ka projek Taj Resort namar ba ki nongshim bynta ha ka thain ki la pynpaw ia ki jingsngewkhia, te ka sorkar ka dei ban leh mar katjuh ia ka projek tih mawshun ha kaba ia ka EIA la phah sha ka bor synshar jong ka Gujarat, ka shaniah ha ka ain jingiada kaba la weng noh, bad ka iehnoh bein ia ka riti synshar jong ka distrik riewlum baroh kawei.
Ka JNC ka pynpaw ruh ia ka jingsngewsih kaba khraw Naduh ba ka jingwan jong ka Shree Cement ka la pharia yaki Paidbah ka thaiñ, khamtam eh ïa ka Elaka Nongkhlieh. Ki nongrep kiba la ieng ban iada ia la ka jong ka khyndew ka shyiap kim lap ia ka jingsngap na ka sorkar.
Ha ka jingbishar paidbah jong u snem ba la dep na ka bynta ka karkhana Shree Cement ha Daistong ha u 2025, la khanglad met ïa ki nongshong shnong tynrai ban rung sha ka jaka bishar la khanglad da ki briew shimet kiba leh na ka bynta ka jingmyntoi jong ka kompeni, da kaba pyndonkam da kita ki gunda ki mafia Jong ka.
Ka JNC kala iohi ia kane ka kompeni ba ka trei ryntih ban pyniakhlad ia ki shnong ki thaw jong ngi , ka leit sha ki nongialam shnong, ka pyndonkam bakla ia ki bor synshar shnong, bad ka pyrshang ban khanglad ia ki kam jong ki seng bhalang ha ki jaka ba ki wad ban treikam. Kane hi kan sa wanrah ka jingma ba khraw hadien habud iaki briew Jong ngi.
Ha ka Sngi u woh Kiang Nangbah, 30 tarik 2025, ka sngi ba kyntang ban kynmaw burom ia u khla wait ka ri, ka JNC ka la kular paidbah ban ieng tylli na ka bynta ka jaitbynriew Jaiñtia. Kata ka jingkular ka ieng skhem haduh mynta, bad ngim ainlad ba kine ki briew ba nabar kin iuhroit iaka hok Jong ngi.
Lada ym ioh jubab ba thikna halor ka jingthoh jingpyrshah jong ngi haduh ka 15 tarik u May 2026, ka JNC Central Executive Committee kan pynjur ia ka jingiakhih jong ka beit beit sha Meghalaya Secretariat, Shillong, ha kine ki sngi ban wan ryngkat bad ka sur bad ka jingiashim bynta ba pura jong ki paidbah Jaintia.
Ngim dei ka kynhun kaba thoh shithi bad kut tang kumta, Ngi dei ka sur jong ka jaitbynriew kaba ka khyndew ka shyiap, ka um, ki khlaw, bad ka hok jong ka riti synshar ka Jong ngi, Ka jingbishar paidbah la buh ha ka 22 tarik u Naitung 2026, bad ngin sa peit aiu ba ka sorkar kan leh.
“Ngin ym shong kli kti katba ki kompeni nabar ki dang shim ia ka hok bad ka jaka jong ngi. La thaw ia ka JNC ban long ka sur jong ki briew jong ngi, bad kata hi ngin sa long.”
