Nongpoh Iaiong 10: Ka seng samla pule ka Khasi Students’ Union (KSU), jong ka North Khasi Hills district, mynta ka sngi ka la pynrem jur bad byrthen kylla ia ka jingleh ki lehnoh Karbi People’s Liberation Tiger (KPLT),kiba la pynthut bad mushlia ia ka hok jong ki nongthep vote ha ka 9 tarik ban jied ia u MP na kane ka jylla Meghalaya ha kaba ki paidbah kim shym la ioh lad shuh ban leit jied ia u nongmih khmat sha Lok Sabha.
“Kane ka dei ka jingpynkheiñ ia ka hok long briew man briew bad ia ka hok ki nongthep vote, ha kaba ki lehnoh ki la donkti ban pynwit bad pynthut ia ki nongthep vote ha kitei ki shnong,” la ong u Samla F Kharkamni, president ka KSU NKHD na Ri-Bhoi district.
Ka Election Commission ka la maham tyngeh ha u snem 2013 ban ym shah shuh ia kito kiba don kyrteng ha ki ar jaka ban thep vote ha ki jaka khappud kum ha Block II, kaba
dei kawei na ki jaka ba iaknieh hapdeng ka Meghalaya bad ka Assam, hynrei ka KSU ka lyngngoh pat ba ka jingleh kitei ki kynhun kieng atiar ka KPLT ka long ban pynbor ia ki briew ha kitei ki shnong ka Block II ban thep ia ki vote ba kordor jong ki sha Assam, kaba long pyrshah ia ka hok ha ka saiñ hima sima ba ki briew ha kitei ki jaka kim treh shuh ban leit thep vote sha Assam.
U Samla Kharkamni u la ong ruh ba KSU ka pynrem jur halor kane ka jingleh ki dkhot ka KPLT ban pyntriem ia ki briew ha ka shnong Umlaper shi sngi shuwa ka sngi ban thep vote, ha kaba ki la siat pynma ruh ia kawei ka puh shilum (JCB) ha ka por 8 baje janmiet ban pynsheptieng ia ki briew kaba long kum ka jingpynbor ba kim dei ban leit thep vote sha Meghalaya na ka bynta ka elekshon sha ka Lok Sabha.
U la bynrap ruh ba ka KSU kam don jingtieng ban pynphai kylla ia ki kam be-aiñ jong ka KPLT lada ka dang bteng biang kumne pyrshah ia ki Khasi kiba shong ba sah ha Block II bad ka KSU kam banse ruh ban pynhiar kput kylla.
Ha kawei pat ka liang, u la pynrem jur ia ka sorkar jylla ba kam shym la lah satia ban pynbiang ia ki lad jingiada ne ki bor pahara ha shilynter katei ka thaiñ, khamtam ba ka Block II ka dei ka thaiñ ba don jingma kaba na katei ka jingkheiñ sting ka sorkar jylla ba ki lehnoh Karbi ruh ki nud ban pynibor pyrshah ia ki Khasi wat haba shit ba shai ka sngi ruh, u la ong.
U la ong ruh ba bunsien bunwat ka KSU ka la dawa ia ka sorkar jylla ba ka dei ban buh noh da ka Police Outpost ha Ummat, khnang ban iada na ka jingshah wan thombor ha kitei ki riew pyntriem bad lada jia ba ki Khasi kiba shong ba sah ha kitei ki thaiñ ki shah hiar thma, mano ban bahkhlieh? u la kren tyngeh ka KSU.(SP News)
