Shillong, Jymmang 08: Ka KSU South West Khasi Hills District bad ka KSU Langkynma Area Unit kan pynlong iaka jingiaid paitbah ( Public Rally) haka 12 Jymmang 2017 na Nonghyllam sha Nongjri ka ban sdang naduh ka por 11 am mynstep na office jongka Seng ha Nonghyllam sha Nongjri.
Ka jingpynlong ia Kane ka jingiaid bad jingialang paitbah ka long,ban pyni iaka jingiatylli kum ka Jaitbynriew watla ka don Ka jingshah rahbor bad dawa pisa jong ki para doh para snam ha katei ka thain man la ki por.
Ban dawa ba Ki runar ki dei ban pyllait noh mardor ia u Samla Dajied Syiemlieh , u Samla ba la Shah rahbor na Umsur bad Shah dawa haduh 5 klur haki riew runar. Ka jingjia Shah rahbor jong une u samla u ba dei tang u nongbud JCB jong u bah Kynsai Dkhar Ka la jia naduh ka 27 tarik u bnai ba la lah bad haduh mynta ym shym la lap ksai Shano u don. Ka Seng ka dawa pyllait noh mardor ia une u samla khlem da siew pisa.
Ban dawa iaki riewrunar ba Ki dei ban Pynkut noh iaki kam thombor haka thain bad ban wanrah noh iaka shong suk shongshngain ha kitei ki jaka.
Ban dawa ba ka sorkar Ka dei ban shimkhia ban pynthikna ba kiba kum kine kim dei ban jia shuh nang ne shakhmat. Ka daw ba jia kiba kum kine Ka dei na Ka daw Ka jing khyndiat ngut palat ki bor pulit ha katei ka jaka bad Kumta kim shym la lah ban tehlakam ia kine ki jait jingthombor pyrshah iaka hok longbriew man briew ha katei ka thain.
Ka Seng ka khot Ka wer namar Kata ia baroh ki paitbah katei ka thain naduh ki Nongialam Niam, ki Nongialam Shnong, ki Nonghikai bad khynnah skul, ki riew rangbah, ki Seng Samla Shnong, Seng Longkmie Shnong ban wan khnang khnang ha katei ka sngi. La ong u samla Forwardman Nongrem President KSU South West Khasi Hills District ha ka kyrwoh kaba la phah mynta ka sngi.
