Shillong, Nohprah 30: Ka seng Hynniewtrep Youth Council (HYC) jong ka Riad Nongtung mynta ka sngi kala wan kiew sha ka nongbah Shillong ban pynlong ia ka jingkhih shong kyllain mungor kaba 12 kynta ha kaba la sdang naduh ka por shiphew baje mynstep bad kan kut mynta ka sngi shiphew baje mynniet ban pynpaw pyrshah ia ka jingbym lah jong ka sorkar ba iada ia ki paidbah ka tei ka thain na ka jingshah thohbor ha ki bor jong ka sorkar Assam.
U Bah M Shadap President jong ka HYC Ri Bhoi District haba kren ha u SP News Agency u la ong ba kane ka jingwan ka jong ki sha Shillong ban pynlong ia kane ka jingiakhih ka long ba ka sorkar kam shym la sngap ia kaei kaba ki paidbah na katei ka thain kila ud la nam sha ka sorkar ha kaba ia dei bad ka jingeh kaba ki ia kynduh na ka por sha ka por halor ka jingshah thombor ha ki briew jong ka sorkar Assam.
La ong ba na ka liang jong ka seng kala dep ban thoh sha ka myntri kam phoh iing ba rim ka kong Roshan Warjri bad kala ai ka jingkular hynrei kam shym la lah ban leh ei ei haduh mynta, ki paidbah kila shah pyndik ha ki briew jong ka jylla Assam ha kiba bun ki liang, hynrei kumba ka paw ka long ba ka sorkar Meghalaya ka tieng ia ka sorkar Assam.
Ka Raid Nongtung ka don kumba 30 tylli ki shnong bad kine mynta ki don ha pdeng jong ka jingeh namar ba ki pulit Assam bad ki lehnoh na katei ka thain ki wan ban pyndik na ka por sha ka por, ka jingkwah jong ka seng ka long ba ka sorkar jylla ka dei ban ai jingiada ia ki paidbah ban lait na ka jingshah pyndik bad shah pynpra ne shah pynsngeh ia ki skhim kiba pyntrei da ka sorkar Meghalaya ha katei ka thain.
Ki paidbah nongshong shnong n aka Raid Nongtung kiba la ia poi sha kane ka jingia shong kyllain mungor kaba 12 kynta mynta ka sngi ki la long kumba 40 ngut ei ei na ki shnong bapher bapher, ha ki placard jong ki la thoh ba lada ka sorkar kam lah ban ai jingiada ia ki ka sorkar ka dei ban ai noh da ki suloi ia ki paidbah ba kin ia da ia lade.
Haba ia dei bad u pud u sam ha pdeng kine ki ar tylli ki jylla la long b aka seng kan sa pynsngew sha ka sorkar bad ki dawa ba ka sorkar pdeng ka dei ban tuklar ia kane ka kam ha kaba ka jylla Meghalaya bad ka jylla Assam ruh kin ia don lang. Ka kam kaba kongsan ia ka seng baki wan ban pynlong ia ka jingiakhih shong kyllain mungor ka long ba ki kwah ban ioh ia ka shong shngian ha katei ka thain.
