Shillong, Kyllalyngkot 15: Ka kynhun ki seng bhalang na kane ka jylla Meghalaya hapoh jong ka lama Confederation of Hynniewtrep Social Organisation (CoHSO) ha ka jingiakynduh lang jong ki nongialam na ki seng bapher bapher kaba la long mynta ka sngi ha Shillong Club, kila shim ia ka rai ban pynlong ia ki jingialang paidbah ban pyrshai halor ka jingpyrshah ia ka Citizenship (Amendment) Bill, 2016.
U Bah Robertjune Kharjahrih haba kren ha ki lad pathai khubor ha dien ka jingiakynduh lang ka jong ki, la ong ba kum ka kynhun kan leit sha kylleng ka bri u hynniewtrep ban pynlong ia ki jingialang paidbah ban pynshai ia kane ka CAB,2016 kaba ka sorkar pdeng ka thmu ban pynlong ain.
Ia ka jingialang paidbah ban pynsngewthuh ia kane kin pynlong nyngkong ha ka 18 tarik ha Jowai West Jiantia Hills District, ha ka 21 tarik pat kin pynlong ha ki ar tylli ki jaka kawei ha Khliehriat East Jaintia Hills District bad ha Umsning Ri Bhoi District bad ha ka 23 tarik kin pynlong ha Nongstoin jong ka West Khasi Hills District bad ha Mawkyrwat jong ka South West Khasi Hills District.
Ha dien ka jong kine ki jingialang paidbah kin pynlong ia ka jingshah thngan balai sngi ha kane ka nongbah Shillong, kata naduh ka 24, 25 haduh ka 26 tarik mynta u bnai. Kane ka long ban pynpaw ia ka jingpyrshah ia ka CAB, 2016.
