Shillong, Rymphang 20: Ka myntri sorkar pdeng ba dei khmih ia ka Textiles, ka Smriti Zubin Irani, ka la plie saw tylli ki projek ha ka thain shatei lammihngi ban kyntiew ia ki kam ba iadei bad ki silk lyngba ka video conference ha New Delhi ha ka sngi ba Ar. Ka Smriti Zubin Irani ka la plie ia ka Muga silk seed production centre ha Tura, Meghalaya, silk printing bad processing unit ha Agartala, Tripura, Eri spun silk mill ha Sangaipat, Imphal bad ka jingkyntiew ia ka sericulture ha Mamit, Mizoram.
Ka myntri ka la plie ruh ia ka ophis ba dang dep tei thymmai jong ka Weavers Service Centres (WSC) ha Indore, Madhya Pradesh bad Kannur, Kerala. Ka la iakren bad ki nongmihkhmat jong ki paidbah, ki ophisar bad ki nongrep bad kyntu ia ki ban wanrah ka jingpynsngewthuh hapdeng ki nongrep bad ki nongthain shaphang ki scheme ai ram (loan) ba don hapoh ka MUDRA YOJANA bad dang shen la pynbna ia ka prokram jingkyrshan pisa na ka bynta ki nongrep- ka PM Kisan bad ka scheme bai bam tymmen na ka bynta ki nongbylla kaba la tip kum ka Pradhan Mantri Sram Yogi Mandhan Yojna.
Ka Muga Silkworm Seed Production Centre (SSPC), Tura Meghalaya ka dei kawei na ki projek ba la shimti da ka Centre Silk Board (CSB) ban pyntreikam hapoh ka Integrated Sericulture Development Project (ISDP) jong ka NERTPS ban ioh ia ki seed infrastructure unit ha ka thain shatei lam mihngi. Ki jingdon ha ka jylla mynta ki la lah ban pynbiang ia ka jingdonkam ha ka liang ka Muga basic seed. Ka jingshna shuh ia ka Muga SSPC ha Tura kan pynkhlain ia ki kam ba iadei bad ka Muga seed sector ha kaba ka jylla kan lah ban pynmih hi bad sam ia ki Muga silkworm seed. Man kine ki unit ki lah ban pynmih 1 lak ki dfls ha ka shi snem bad yn lah ban kdup ia kumba 300 ngut ki nongrep ba ia trei ia kane ka kam.
Ia ka Silk Printing & Processing unit ha Agartala, Tripura la pynlut T. 3.71 klur ban pynmih, ban shon bad shna 1.5 lak meter ki silk ha ka shi snem. Ia kane ka projek la pyntreikam direk da ka sorkar jylla ha ka jingiatreilang bad ka CSB bad kalong kaba lah kloi ban sdang ia ka jingtreikam. Ka Textiles printing kadei ka rukom ha kaba ia ki jingsaindur la shon ha ki jain da kaba pyndonkam ia ki rukom bad ki sap bad leh ha ki jain ba ladep thain.
Ia kine ki jain ba ladep shon la pyndonkam ha ki saree, ki sopti, ha ki tiar pynriam iing bad ki shuki. Bun na ki jain thain kti bad thain machine ba pynmih ha Tripura lah rah sha Kolkata, Bengaluru, Bhagalpur bad kiwei kiwei ki jaka ban pynshongdor na ka jingshna bad jingshon. Kane ka unit kan kyntiew bad kyrshan ia kane ka kam ha ka jylla bad kan kyntiew ruh ia ki nongthain ba don ha ka thain.
Ia ka Eri Spun Silk Millin Sangaipat, Imphal East, Manipur la mynjur ha ka jinglut kaba T. 21.53 klur kaba la ioh jingmynjur ha u bnai Nailur 2018 bad yn pyntreikam da ka sorkar jylla ha ka jingiatreilang bad ka CSB. Kumba 65% ki Eri cocoon ba la pynmih ha Manipur la pynkylla sha ki ksai da kaba pyndonkam ia ki kor kiba rim bad ki kor ba shu iuh kjat. Kaba sah baroh kumba 35% ki Eri cocoon la pyniaid iew shabar ka jylla khlem da pynshongdor kaba la pynlong ia ka jingduna ka ioh ka kot jong ki nongrep.
Lah ban pynmih 55 MT u ksai Eri spun uba bha da kaba pyndonkam kumba 74 MT ki Eri cocoon ha ka shi snem. La khmih lynti ba kane ka projek kan wanrah ia ki lad ioh kam ioh jam sha 107 ngut ki briew ha ka shi snem bad kumjuh ruh kan plie lad ia ki nongrep sai Eri kumba 1,500 ngut bad kumba 730 ngut ki nongthain.
Ka projek ban kyntiew ia ka sericulture ha Mamit district jong ka jylla Mizoram la mynjur ha ka jinglut kaba T.11.56 klur, ba kynthup ia ka bhah jong ka sorkar India kaba long T. 10.82 klur. Ia kane ka projek yn pyntreikam da ka jylla ha ka jingiatreilang bad ka CSB. Ka Mamit kadei kawei na ki aspirational district ne ka district kaba ai mynsiem kaba la ioh ka jingithuh na ka NITI Aayog ha ka baroh ki liang jong ka roi ka par naduh u snem 2018-19 ter ter. Kane ka kynthup 14 tylli ki district ha ka thain shatei lammihngi ba kynthup baroh phra tylli ki jylla jong ka thain shatei lammihngi.
Kane ka projek kalong na ka bynta ban kyntiew ia ki ksai Eri ha Mizoram ka ban phaikhmat halor ban wanrah ia ki kam ba iadei bad kine ki jait ksai naduh ka jaka ri ia ki khniang sai rusom, ka jingri ia ki khniang rusom, ki kam thain bad kiwei kiwei. Kan iarap ruh ia ki briew jong ka thain ha ka ioh kam ioh jam kumjuh ruh kan kyntiew ia ka jingpynmih ia ki ksai ba bha, bad ki mar ba ladep shna.
Kane ka projek ka kynthup ia 684 ngut ki nongioh jingmyntoi bad kan plie ki lad ioh kam ioh jam jong 3,250 ki briew ha ka shi snem. La antad ia ka jaka ri Eri cocoon kaba 500 acre (400 acre kadei kaba thymmai bad 100 acre kadei kaba la don lypa) ha kaba yn ioh lum khajna kumba T.60,000/- haduh 70,000/- shi acre/shi snem katkum ki dor jong ki niang rusom bad kynthup ka jingdie ia ka sop nianglong.
Ia ka WSC, Kannur la seng ha u snem 1972 bad ka la treikam na ki jaka ba shu shim wai. Ka jingtei ka la sdang ha u bnai Risaw, 2016 bad la pyndep ha u bnai Rymphang, 2019 ha ka jinglut kaba T. 228.53 lak.
Ia ka WSC, Indore la seng ha u snem 1962 bad ka la treikam na ka jaka ba shu shim wai. Ka jingtei ia ka ophis ba thymmai ka la sdang ha u Risaw, 2017 bad la pyndep ha u bnai Nohprah, 2018 ha ka jinglut kaba T. 209.43 lak.
