Shillong, Jymm
ang 05: Ka Khasi Author Society (KAS) mynta ka sngi kala pynlong ia ka jingiaid paidbah kum shibynta na ka jingrakhe ba shisnem lynter ka jingdap 175 snem jong ki dak khasi. Ia kane ka jingiaid paidbah la sdang na iing dorbar shnong Jaiaw Lum Pyllon bad la pynkut ha Madan student da ka jingialang paidbah ha kaba palat ia ka 5000 ngut ki briew kila ia poi na kylleng kane ka Ri Khasi kynthup ia ki khynnah skul bad ki samla pule ha ki college.
Ha ka jingkren jong u Dr B R Kharlukhi president ba rim jong ka KAS ha kane ka jingialang paidbah u la ong ba ka ktien khasi ka long kum ka pangsngiat ksiar, ha kaba kum ka jaidbynriew ka dei ban ri kyndong ia la ka jong ka ktien, ym tang ba ri kyndong ia ka hynrei dei ban iada ia ka da kaba pynrung hapoh ka 8th Schedule jong ka Riti synshar jong ka Ri.
Ban leh ia kane ka don kam ia ka sorkar jylla bad ia ki nongmih khmat na kane ka jylla ban ia kren ia ka hapoh parliament ka dorbar bah jong ka Ri India. La pynkynmaw ba ka jingiakhih ban ioh jylla la ka jong ka nongrim ka long halor jong ka ktien.
Ha kane ka jingialang paidbah la iathuh ba dei ha u snem 1959 ka skul jong ka Kolkatta kaba dei peit ia ka riti dustur bad ka ktien kala pynmih ia kawei ka kot kaba la ai kyrteng ka ‘The Culture and Heritage of India’ in IV volumes” ha kane ka kot la kdew ia ka rukom kren ia ki ktien bapher bapher ha kane ka Ri India bad ha North East la kdewn ia ka ktien Khasi bad Assamese.
Ha katei ka por ki briew kiba kren ia ka ktien khasi ki long tang 2, 90, 982 lak bad ha u snem 1981 la pynurng ia ka ktien khasi hapoh ka skul bah jong ka North Eastern Hill University (NEHU) kum kawei na ki sobjek ban pule bad mynta kiba kren ia kane ka ktien kila kot sha ka 10, 91, 087 lak ngut.
La ong ba ka sorkar jylla kala thaw ia ka committee kaba kyrpang halor kane ha kaba u Dr Kharlukhi u la ong u wei na ki dkhot jong ka bad na ka liang jong ka committee kala dep ban phah ia ka jingshem jong ka sha ka sorkar jylla bad mynta ka dei ka kam jong ka sorkar ban phah sha ka sorkar pdeng ban pynioh ia ka jingithuh ia ka ktien khasi da ka riti synshar jong ka Ri.
Ia kano kano ka ktien ban ioh rung ha ka 8th schedule jong ka riti synshar jong ka Ri, la don kam ban pynkylla shuwa hapoh ka sorkar jylla ban leh ia kane ka dei ka kamram jong ki nongmih khmat ha ka iing dorbar thawain ka jylla bad kham tam eh ki MP sha parliament .
Ha kane ka sngi kila don shibun ki nongkren na ki nongialam seng bahpher bapher bad ha ka jingkren jong kila pynsngew ia kawei ka sur ba dei ban dawa ba ia ka ktien khasi dei ban ioh noh ia ka jingithuh noh hapoh ka Riti synshar jong ka Ri India hapoh jong ka 8th Schedule.
