Shillong, Jylliew 29: Ka jylla Meghalaya ha kine ki sngi ki bnai kala iohi ia shibun ki jingjia ba sngewsih ha kaba ia dei bad ka jingthombor ia ki kynthei khynnah na kid aw kiba ym lah ban tip, kumba ka long mynta ka jylla kala paw ha kine ki kam sniew bania nujor bad kiwei ki jylla ka dong shatei lam mih ngi jong ka Ri India.
Katkum ka jingkhein tang ba la ioh lum da ki pulit ka jingshah thombor jong ki kynthei khynnah ha kane ka jylla tang mynta u snem 2017 kala kot haduh 184 tylli kata ka long tang ha kine ki hynriew bnai kiba la leit noh. Kum kine ki jingjia kala pynwit shisha ia ka imlang sahlang.
Na ka liang jong ki kynhun niam bad ki nongrwai kila ia rai ban ia wan lang ban pynlong da ki sur jingrwai la shai ka sngi ha ka por 5.00 pm jan miet ha khyndailad bad kane ka long kawei na ki lad ki lynti ban pynsngew sha ki paidbah ba dei ban pynkutnoh shi syndon ia kane ka jingthom bor ia ki kynthei khynnah. Ha ka juh ka por ban kyntu ia ka sorkar ba ka dei ban pyndon kam ia ki ain kiba don ban ialeh pyrshah ia ki nongleh kam sniew.
Ia kane ka jingpynlong ia ka jingiaput ia tem la shai ka sngi la ia trei lang ka Urban Mission, ka sengjong ka KJP Synod Sepngi ryngkat bad ki nongrwai kane ka nongbah Shillong ia kaba la tip kum ka Summersalt da kajingkyrshan lang jong ka MarBa Hub, Batesi TV bad ka RedFM. Ia kane ka jingtem jingpud ka ban long la shai ka sngi la tip kum ka ‘Strike Down’ kum ka dak ban ong ia ki briew pynkut noh ia kane ka kam leh bor thom bor ia ki kynthei khynnah.
Nalor ki jingrwai kan don ruh ia ka jingialehkai drama bad ka jingthmu ka long ban pynsngew sha ki paidbah ba ka kam lehbor thom bor ia ki kynthei khynnah ka dei ka kam khawpud bad ban ialeh pyrshah ia kane don kam ka jingiatreilang na ka bynta ban wanrah ia ka shongsuk shong sain ha ka imlang sahlang.
La kyntu ia ki paidbah baroh ba kin ia poi lang ha katei ka jaka kum ka dak jong ka jingiaieng tylli kawei ban ia khun pyrshah ia kine ki jingeh kane ka long katkum ka khubor kaba la phah da u Bah Kit Shangpliang dkhot jong ka Summersalt mynta ka sngi.
