Shillong, Nailar 19: Ban dang kham pynkhlain shuh shuh ia ka jingshim nongmuna na ki paidbah na ka bynta ban lap ia ka jingdon u COVID-19 mynta ka sngi la sdang ha Motphran kawei na ki jaka paidbah ba bun briew kiba iaid ba ieng hapoh kane ka nongbah Shillong.
Ha kane ka sngi sdang ki riew paidbah kila ia treilang bad ka sorkar ban leit sha kane ka jaka lum nongmuna kaba la buh ha Motphan, ha kane ka sngi sdang la iohi ba ki briew kila ieng da u lain ban shah shim nongnuma na ka bynta ka COVID-19.
Na ka liang jong ka tnad ka koit ka khiah kala buh ia kine ki jaka shim nongmuna ha kane ka nongbah Shillong ha ki lai tylli ki jaka ba bun ki briew ki ia leit ia wan, na nolor ka Motphran, la buh ruh ha Khyndailad bad ha Anjalee jan Cinema Hall.
Ka jingshim nongmuna na ki jaka paidbah ka long ban lap hato kane ka jingpang khlam COVID-19 kala saphriang ne em sha ki paidbah, namar kaei kaba la leh baroh shikatta ka long tang ia kiba wan phai sha ka jylla bad kito kiba don ka jingiajan bad kiba la ioh ia kane ka jingpang COVID-19.
Hynrei da ka jingtest COVID-19 positive ia ki briew kiba khlem don kano kano ka jingleit sha bar ka jylla lane wan phai na sha bar ka jylla kum na Rilbong bad Jhalupara, Mawprem kala pynlong ia ka sorkar ban shim nongmuna na ki riew paidbah ha kine ki jaka paidbah ban sngewthuh shai ia ka jinglong jingman kane ka jingshitom COVID-19 ha kane ka nongbah Shillong.
