Shillong, Naitung 16: Ki dorbar shnong kiba don sawdong jong ka Nongpoh kila shim ia ka rai ban pynlong ia ka jingialang paidbah ha ka 20 tarik mynta u bnai ban pyrshah ia ka jingthmu jong ka Transport Department ban buh ia ka Way Bridge hapoh jong kane ka shnong kaba don ha Ri Bhoi District.
Haba kren ha u SP News Agency u bah CB Syiem u wei na ki rangbah shnong jong ka Nongpoh u ba long ruh u Chairman jong ka synjuk ki rangbah shnong, u la ong ba da lei lei kin nym shah ia ka Transport department ba kin buh ia ka Way Bridge ha kane ka shnong na ka daw jong ka jingkhap ngiah kali.
La iathuh ba haba kila ia kren bad u Deputy Commissioner u CP Gotmare, la ong ba kane ka dei ka jingbthah na ka Transport department bad kajingbuh kan long tang shipor. Halor jong kane na ka liang jong ki dorbar shnong ki pyrshah bad ka sorkar kala dei ban wad jaka shawei ym hapoh jong ka shnong nongpoh.
Kumba ka long mynta ym tip lano kin sdang ia kane ka way bridge hynrei kum ki nongkit kam shnong kiba iohi ia ka jingkhap ngiah kali ha kane ka shnong kim kwah ban iohi ba kan dang don shuh ka jingkhap ngiah kali ka ban pynsah kut da ki kynta ha ka leit ka wan. Ha ka jingshisha ka way bridge kala don ha Umling balei ka sorkar ka kwah ban buh sa kawei ha nongpoh la ong u Bah Syiem.
