Shillong, Nohprah 17: U Bah LG Nongsiej Chairman jong ka Khasi Hills Autonomous District Council (KHADC) u la ong ba ki dang ai ia ka jingbethah na u Lat jong ka jylla lano ban pynsmai ia ki MDC kiba thymmai kiba la jop ha kane ka Election MDC shiteng samoi.
Haba kren ha u SP News Agency u Bah Nongsiej u la ong ba na ka liang jong ka ophis ka long kaba kloi banpynsmai ia kine ki MDC kiba la shah jied thymmai ha kano kano ka por lada kala wan ka jingbethah na u Lat jong ka jylla.
Hynrei u la ong ba leh se kane ka taiew ban wan ka ophis kala lah ban ioh ia ka jingtip kaba shai kdar lano ban pynsmai ia kine ki MDC kiba thymmai. U Bah Nongsiej u la ong ba na ka liang jong u kum u Chairman u la long u ba la kloi ban pyndep ia kaba don kam ban pynsmai ia ki MDC.
KI MDC kiba thymmai kiba la shah jied ha ki paidbah ki long u Bah HS Shylla na 8-Nongkrem, u Bah Ricky Shullai n aka 15-Laban Mawpren, u Bah Samlin Malngiang ha ka 22- Nongspung Sohiong, u Bah Equador L Nongrang na ka 23-Mairang Nongkhlaw, u Bah Blandingstar Warjri na ka 24-Pariong Mawthadraishan bad uBah Kimfa Sidney Marbaniang na ka 28-Rambrai Jyrngam.
