Jowai. Jylliew 22 : Ka AJYWO na ka bynta ka bha ka miat jong ki khun ka Ri Pnar, ka dawa na ka Jaintia Hill Autonomous District Council ba kam dei shuh ban ai trading License lane pynthymmai shuh shuh ia ki Trading License khnang ba ki briew trai ri trai muluk kin ioh lad ban phrung ha ki kam business bapher ba pher ha ka Ri Lum Jaintia ha kum kane ka saw ka sian jong ka jingkyrduh kam na ka jingkhang tih bad khaii dewiong jong ka National Green Tribunal.
“Ka long kaba i sangsot mynta ba naduh ba la khang ia ka kam tih bad khaii dewiong ha ka jylla Meghalaya, shiteng na ki nongshnong shnong trai ri trai muluk jong ka Ri Lum Jaintia ki la shu shong khlem kam khlem jam bad ruh bun napdeng jong ki kiba la sdang sa ka iapthngan namar bym ioh kam ioh jam shuh naduh, katba ki byrjylla bad ki nongwei khamtam kito ki ba shong ba sah ha ki thain East Jaintia Hills District, ki im sadhai khlem pyrwa ei ei ruh em ha ki dukan jong ki namar naduh ki dukan die waidong haduh ki dukan heh la pyniaid da kitei ki barjylla bad ki nongwei Nepali”, la ong u Bah M H Dkhar President jong ka AJYWO Sengkmie lyngba u kyrwoh.
U tei u nongialam jong ka AJYWO u la ong ruh ba kiba bun kito ki barjylla bad ki nongwei Nepali ki ba bat ia ki kam business kum ki dukan die marbam mar dih, dukan die jain die nep, ki restaurant, hotel bad ki dukan die tiar die tar ba pher bapher lait noh kito ki jait dukan ba dih ia ki tiar ba don jingiadei bad ki kam dewiong kim khuslai ia la de wat la khang ia kajingtih dewiong ruh namar kine ki shong beit ha ki dukan jong ki bad ki tip ba ka pisa ka wan beit. U ban wan thied wan peit un dei u trai ri trai muluk hi.
U Bah Dkhar u la ong, “Ka seng namar kata ka daw, na ka bynta ka bha ka miat jong ki para doh para snam jong ngi, ka dawa na u CEM ka JHADC bad ka Executive Committe jong u ba ki dei ban khang khang noh shisyndon ia ka jingai bad jingpynthymmai Trading license ia ki barjylla bad ki nongwei baroh khnang ban ai lad ia ki briew jong ngi ban ioh bsuh khlieh ha ki jaid business ba pher ba pher kiba la bat la baroh shikatta da kitei ki barjylla bad ki nongwei.
“Ka seng ka kyntu ruh ia ki Rangbah Shnong jong ka Jaintia Hills ban sangeh noh ia ka jingai NOC ia kino kino ki barjylla kiba kwah ban ialeh Trading License lane pynthymmai ia ka khnang ban plie lad ia ki briew jong ngi lym kumta ka jingkordit bah jong ka jingkyrduh kam bad ka jingiap thngan ka la sdang wan lynshop ha Jaintia Hills” ong shuh shuh u Bah Dkhar.
Ka AJYWO ka kyntu ruh ia ki briew jong ka Jaintia Hills khamtam ha East Jaintia Hills ba ki dei ban kyndit bynriew noh mynta ban knieh bad bat lut ha lade ia baroh ki kam business ba pher ba pher ba la bat bad pyniaid la baroh shikatta da ki barjylla bad ki nongwei. “Ka por mynta ka la dei ia ki briew jong ngi ban long kiba stad bad kiba iohi jngai. Mynta ka la dei ia ki briew jong ngi ban kyndit noh na kaba ioh thiah bad ban sdang noh ban trei ia baroh kine ki kam kiba ki la iehnoh la baroh shikatta ha u barjylla bad u nongwei bad ba kim dei ban ailad ia kine ki kam khaii ha ki barjylla bad ki nongwei lane shaniah tang ha u dewiong namar u dewiong un nym neh junom. Namar lada ngim leh kumne hangno ngin ieng bad kumno ngin im ynda la kut u dewiong?.Dei ban niew kor wat la ngi ioh shipiah shi suka ruh na kaba ngi trei namar ka um shi jaw ka pynlong ia ki duriaw bah. Kumta, ka jingleh jong ngi kumne kan pynim ym tang ia lade hynrei ia ka jaidbynriew jong ngi ruh lym kumta kan sa poi ka por ba ngin sa kylla long kum ki nong Tripura”, la pynkut u Bah M H Dkhar ia u kyrwoh.(sp News)a
