Shillong, Risaw 19: Leit iakynduh ka Seng FKJGP Mawsynram Circle ia ka Dr. Alice K Vizo kaba dei ka Sr. Superintendent of Post Offices, Meghalaya Division mynne ka sngi ha kamra treikam jong ka kaba don hapoh GPO, Shillong ban pynsngew ha khmat jong ka ha kaba iadei bad ka jingdkoh ka rukom treikam ka Sub Post Office kaba don hapoh Mawsynram bad ki Branch Post Office kiba don hapoh Mawsynram Block baroh kawei.
Ha ka jingiakynduh mynne ka sngi u Samla Banshai Marbaniang, President FKJGP Mawsynram Circle u la pynpaw ha khmat jong ka halor ka jingeh kaba ki paidbah ki iakynduh na kapor sha kapor khamtam na ka bynta kito ki longing ki ba ju ioh ia ka skhim bai bam tymmen, ka jingiarap naka bynta kiba duna dkhot met, ki longkmie kiba la iap lok bad kiwei kiwei ki jingmyntoi kiba ki ju ioh manla kapor ba ka ju don ka jingpynslem ban siew ia ka pisa shapoh ka account jong ki kaba shimpor da ki bnai ban ioh sei ia katei ka pisa kaba ki thep ha la ka jong ka account.
Ka seng halor kane ka bynta kala pynpaw bad ong ruh ha ka ba ka ju ioh ia ka jingud jingnam na ki nongioh jingiarap man la kapor bad haba iaid sharum shaneng ruh la ju iohsngew ia kane ka jingeh kaba ki paidbah ki iakynduh khamtam eh ki longkmie bad ki riew tymmen ha kaba ki ju pynpaw ba ka don ka jingpynslem ban siew ia ka pisa wat hadien ba ladep ban thep ia ki cheque kaba kila ioh pdiang napoh ki ophis sorkar ruh kumjuh.
Ym tang katta u Samla Banshai u la ban jur ha ka ba ka ju don ka jingpynslem wat ban siew ia ka bainong sngi sha ki nongtrei Job Card jong ka skhim MGNREGS jong ki Village Employment Council bapher bapher kiba hap hapoh ka Block Mawsynram ha kaba kidei ban ioh iaka bainong sngi hadien ba ki ladep ban trei ia ki jingtrei hapoh ka shnong ka jong ki. La ju ioh sngew ia kane ka jingeh kaba la mih na kapor sha kapor kaba la pynkylla long ia ki Job Card Holders ban kynran dien wat ban thep pisa hapoh Post Office.
Halor kane ka bynta ka seng kala dawa naka ba kan shimkhia khlem da pynslem khnang ban lah ban pynkloi bad iarap ia ka jingeh kaba ki paidbah ki iakynduh. Na ka liang jong ka Dr. Alice kala kular hakhmat ka Seng ba kan shim khia noh kham kloi katba lah tang hapoh une u bnai ban bishar bniah ia baroh ki jingeh ha kaba ki paidbah ki iakynduh khamtam naka bynta kito ki longing kiba dei ban ioh ia ki jingmyntoi bad ruh ban thaw kilad ki lynti kumno ban peit bniah khnang ban lait na kitei ki jingeh kiba ju iakynduh manla kapor.
Ka Seng ka la dawa ruh na ka Sr. Superintendent of Post Offices ban thung shuh shuh ia ki staff hapoh ka Sub Post Office kaba don hapoh Mawsynram wat hapoh ki Branch Post Office kum u Branch Post Master bad kiwei kiwei ki staff kiba donkam naka bynta ka jingbit jingbiang u paidbah. Ka Seng kala ban jur ruh ba lada kano kano ka kam kaba dang lah hi ban trei da ki briew kiba dei napoh katei ka thaiñ dei ban pyrkhat shuwa nyngkong ia ki khnang ba kan wanrah i aka jingsuk ha kiba bun ki liang. Ka Dr. Alice ka la ai ia ka jingkular ba kan shimkhia halor kane ka bynta bad ban rah sha ki bor kiba kham shalor ban pynsngew ia kane ka jingeh kaba ki paidbah ki iakynduh bad ka jingdonkam kaba dei ban leh noh kham kloi katba lah.
Ha dien kata ka seng kala leit ruh ban iakynduh ia u Inspector of Post jong ka South Sub-Division u Deepak Das uba dei peit ia ki Sub Post Office bad Branch Post Office kiba don hapoh ka Mawsynram Block baroh kawei. U Samla Banshai u la pynpaw hakhmat jong u ia kijuh ki jingeh kaba ki paidbah ki iakynduh bad la ong ruh ba lehse kalah ban dei nakadaw ka jingduna palat ki nongtrei ha katei ka jaka kaba la pynkylla long ban wanrah iaka jingeh kaba la pynkylla long haduh katne. Ka seng ka la ong ruh ba hapoh Sub Post Office ka badon hapoh Mawsynram don tang 3 ngut ki staff kynthup ia uwei u Sub Post Master, u wei u Gram Dak Sevak Mail Delivery (Postman) bad uwei u Gram Dak Sevak Packer. Lyngba ka jingduna than ki staff ka lah ban wanrah ia shibun ki jingeh kaba ki paidbah ki ju iakynduh manla kapor. Lada katei ka Sub Post Office kaba don hapoh Mawsynram kan hap ban peitlang ia kiwei pat ki Branch Post Office kiba don hapoh ka Block kan wanrah pynba iaka jingeh kaba kham khraw shuh shuh iaki paidbah ki ba ju pyndonkam iaka Post Office kum ka jaka kynshew pisa bad kiwei kiwei ki kam.
Ha kaba iadei bad ka skhim MGNREGS la pynpaw ba ki Sub Post Master ki ju ioh ia ka Commission (Incentive) kaba kyrpang na kane ka skhim ym napoh ka Department kaba kot sha ka Rs. 1 tyngka bad 2 tyngka kawei kawei ka account. Dei na kane ka daw ngi sngewthuh shai kum ka seng ba ki post office bunsien ki trei miet ban pyndep ban thep iaka pisa bainong sngi sha ki nongbylla na kadaw ka jingioh nong nadien nalor ka tulop kaba kila dep ioh. Na kaliang jong ki katto katne ki staff jong katei ka ophis ki la pynpaw ruh ba ka skhim MGNREGS kam shym la paw kum ka Work Load hapoh ka jingtreikam jong ka Post Office dei na kane ka daw ba bun na ki account jong kane ka skhim ki kylla long ban slem ka jingsiew ha kaba kidei ban ioh namar ia ki cheque ba ladep ban pyllait napoh ka ophis u BDO u Sub Post Master um lah ban leh hi ban ai clearance ia kitei ki cheque un hap ban phah shuwa shapoh Shillong bad hadien kata un salah ban siew ia ka pisa sha ki trai nongioh ia ka pisa.
