Jowai, Risaw 17: Ka jaintia Youth Federation da kawei ka jingthmu ba bha na ka bynta ka jingmyntoi jong ki khun samla ka Ri lum jaintia, ka la leit ban ia kynduh ia ki heh jong ka company Jio mobile network ban dawa lang ia ki ban shim ka jingkit khlieh kum ki nongwan sengkam kiba la don ophis ha Ladthadlaboh, Jowai, West Jaintia District ban iarap thungkam ia ki samla trai shnong kiba ym donkam donjam.
Ka jingbym don kam don jam ki samla trai ri, ka pynlong ia ki ban shu leh kulmar bad im lyngkar da kaba ngop ha ki jingsniew ba bun jait kum ha kaba dih kiad, dih drug, kam awria, bad wat ha ki kam tuh kam lute ruh kin nym salia tang ban ioh pynhun ia ka jingkwah haba la ban ka duk ka shitom, ym banse ban thom ha ka pyrthei kyrduh kam.
Na ka liang ka JYF, ka dawa ia baroh ki kompeni shimet kiba pyniaid ia satellite network jong ki ha ka thain shatei lam mih sngi, kiba la pynieng ia ki Tower mobile phone jong ki ba kin shim khia ban iarap ai kam shwa ia ki samla ka Ri lum jaintia, katkum ba ki lah ban trei la ha ophis ne ha kiwei kiwei ki rukom trei.
Ka Seng da ka jingsngewkhia halor ka jingkyrduh kam ki khun samla trai muluk la ha ki kam sorkar ne ki kam private, ka dawa na ki bor ba dei khmih ia ki ne ki private company kiba treikam hapoh Ri lum Jaintia ba kin pynrung kam shwa mardor ia ki samla trai shnong, ym da kaba wanrah ia ki briew na shabar ka jylla namar ba ki samla trai ri ruh kim duna shuh la ha ka kyrdan ne ha ka jingstad pynkut u President ka JYF.
