Shillong, Jymmang 09:Ka KSU Huroi Unit haka 9 tarik u Jymmang ka la ioh ban pynsgew bad ruh ban dawa ha khmat ka Kong Santa Mary Shylla ba dei ka nong mihkhmat jong katei ka thaiñ ha kaba na ka Liang Jong ka Khasi Students’ Union (K.S.U) Huroi unit hapoh ka jingialam u President u Samla Wallam Lamin Gadew bad u Vice-president samla Gilbertstar Khonglah ki la ioh ban ia kynduh markhmat ia ka MLA ka 5-Sutnga Saipung Constituency ka kong Santa Mary Shylla ha ka jingwan jong ka sha shnong Huroi.
Na ka Liang jong ka Seng ka la ioh ban pynsngew halor ka jingeh ki paitbah nongshong shnong jong ka thaiñ Border,naduh ka shnong Lejri, Lahaleiñ bad ka shnong Huroi,ha kaba iadei bad ka jingktieh shaba palat jong ka surok khamtam eh ban dawa pynkynriah mardor ia ki Border Security Force (BSF) kiba thaw ktem be-ain ha jingkieng Sonapyrdi bad ki ba juh pyndik man ka por ia ki paitbah ka thaiñ Border.
Na ka Liang jong ka Kong Santa Mary Shylla ka la kular hakhmat Jong ka KSU ba kan shimkhia halor kane ka mat kaba ka seng ka la dawa,bad ka la kular ruh ban shimkhia bad ban pynsngew sha ka sorkar jylla bad sha ki bor ba dei peit ia ka tnat home jong ka sorkar India ha kaba iadei bad ka ktem be-ain jong ki BSF ha Sonapyrdi bad ka la ong ruh ba kan ia trei ryngkat ryngkat lang halor kane ka mat jong ka jingdawa jong ka seng.
Kumban shu pynkynmaw ba ka jingdawa pynkynriah jong ka Seng ia kane ka ktem shipai ha Sonapyrdi kam dei shuh ka ba dang thymmai hynrei ka dei ka mat ka ba la dawa na ka por sha ka por.namar ha katei ka jaka kam dei shuh ka ba shngaiñ ia ki paitbah ha ka leit ka wan namar ka jingleh donbor bad leh riewkhlaw ki ne ki shipai sha ba palat.
Kumta na ka liang jong ka Seng ngi kyrpad jur bad dawa jur na ka sorkar jylla bad na ka MLA ba kan leh kloi noh ha kaba ia dei bad kine ki shipai,katba ka jingjia ba sngewsih kam pat jia ha katei ka jaka kum ba la jia ha ka shnong Mawshun.
Ka seng ka la maham ruh ia kitei ki shipai ba ki dei ban mih noh na kato ka jaka bad lada kitei ki shipai jong ka sorkar kim sngew ia kane ka jingmaham jong ka Seng,ka lah ban poi ruh sha u pud ia pyni bor.
