Shillong, Naitung 20: Ka State Youth Wing jong ka party KHNAM, ka sngewkhia ban iohi ba ki kynnah skul, khamtam ki ba dang khynnah ka rta, ki hap ban kit ia ki pla skul ki ba khiah bha haba ki leit sha skul, ka ba ktah bha ia ka koit ka khiah jong ki. Kane kadei ka phang kaba iadei bad ka koit ka khiat jong ki hep barit jong ngi, ki bang long ka lawei jong ka jylla, ngi donkam ban ri sumar bha ia ki.
kane ka mat kam dei kaba ktah tang ha ka jylla Meghalaya, hynrei sha kiwei ki jylla ruh, kum ban shu kdew ba u wei na ki nongtrei sngewbha u la ujor da ka PIL halor ka jingkhia palat ki pla skul ki khynnah ka Maharashtra, bad ka Mumbai High Court ba donburom ka la leh ia ka ba donkam, ka sorkar jylla Maharashtra ka la thaw ruh ia ka committee ba kongsan ban peit ia kane ka phang, Kane ka committee ka la wanrah ia ki 5 tylli ki jinglap bad 44 tylli ki jingai jingmu, kat kum kane ka report haduh 58 percent ki khynnah skul ba 10 snem shapoh ki don ia ka “Mild Muscle pain” bad haduh 75 percent ki ba hapoh 12 snem ki khynnah ki ioh jingpang naka por sha ka por na ka daw ka jingkhia ki pla skul.
Haduh na ka liang jong ka tnat ka koit ka khiah ruh ki la maham na ka jingktah ki pla ba khiah ia ki khynnah skul, ladon ki ki jingai jingmut ba ki pla skul kim dei ban khia palat ia ka 10 percent naka jingkhiah jong i khynnah skul, kane ka committee kala ai jingmut ruh ban buh tang 3 subject ha ka shi sngi, ar tylli ki period naka bynta kawei ka subject, bad bun kiwei kiwei ki jingai jingmut, ki ba ka sorkar jylla jong ka Maharashtra kala pyntreikam. Ngi tip hi ba ki khynnah skul ki hap ban kit shibun ki jingkit ha ki pla skul jong ki, naduh ki pencil box, compass pox, ki lunch box, ki bilor um, ki copy ki kot, ki practical journal bad ter ter, bad wat la kine ki khynnah rit kim tip ba kan ktah ia ka koit ka khiah jong ki, donkam ban iada ia ki.
ka seng ka la juh kyntu ia ka sorkar jylla ban wanrah noh kham kloi ia ka Education Policy, bad ngim tip sa katno snem kan shimpor ba ka sorkar jylla ka shimkhia halor kane. Ka seng ka kyntu jur ia ka sorkar jylla, khamtam naka liang jong u myntri ka pule puthi bad shimkhia ia kane ka jingeh jong ki hep barit ki jong ngi, da kaba ia syllok bad ki skul bapher bapher ban wad ki lad ki lynti ban pynduna ia ka jingkhia jong ki pla skul. La ong u bah Thomas Passah president Youth Wing jong ka seng KHNAM.
