Shillong, Jylliew 23: Ban ia sngewthuh kiba bun ba lang ki khun ki hajar jong ka Bri Hynniewtrep, ngi sngewdei ban pynsngewthuh bad ban pynshai ba ka synshar u Khasi ka dei kaba bha tam lada ia thew bad kiwei ki jingsynshar ha ka sla pyrthei.
Ki jingong ba ka kham bha kata ka synshar paidbah, ka long kaba bakla shibun, ngi sngewdei ban da kyntu jur ia ki bym pat sngewthuh ia ka thymmai jong ka synshar khadar ka Dorbar u Khasi ban pyrkhat sani bha ym ban shu ia shongshit kulmar ia kita ki jing ong ba ka kham bha ka ‘synshar paidbah’, namar ki don bun tylli ki jaid ‘synshar paidbah’ ne kita ki ‘democracy’ kiba bun na kitei ki synshar paidbah ki la kylla long ka synshar laitlan.
Ka don ka synshar paidbah ha USA ha kaba ki paidbah ki jied hi ia u President, katba ha Ri India ki paidbah ki jied ia ki MP bad hadien kata ki sa thaw liang ban jied ia u Prime Minister, ki paidbah ka Ri India kim jied ia u Prime Minister. Kumjuh ia u President ka Ri India ki nongthep vote dei tang ki MP bad ki MLA jong ka Ri India, ki paidbah ka Ri India kim jied ia u President. Lada phai sha Ri France, u ba ialeh President u dei ban ioh bad tam vote 51% na ka jingthep vote lada ym don ba tam ia ka 51% ki ar ngut ki candidate kiba hakhmat tam, kin hap ialeh biang bad ki paidbah ki hap thep vote biang.
Ha Switzerland, ka Parliament kam lah ban thaw kano kano ka Ain katba ym pat mynjur ki paidbah bad kata ka ain ka dei ban ioh 80 na ka 100 ka jingthep vote ka jingmynjur na u paidbah. Ha Switzerland la jan man ka taiew ki paidbah ki thep vote halor ki ain kiba pher bapher.
Ha Ka Democracy u Khasi, ka ia pher bad kiwei ki Democracy ne kita ki ‘synshar paidbah’ ka nongrim synshar khadar u Khasi ka shong nongrim ha ‘uba ioh ia ka mon uba bun ba lang’ kaba mut ‘consensus’ kaba mut ka kumno kumno khyndai phew (90) na ka shispah (100). Ka synshar u Khasi KAM shong nongrim dei ka synshar ‘Majority’ namar ngim don ‘opposition’ ne ‘ruling’ hapoh ka Dorbar Kur, Dorbar Shnong, Dorbar Raid ne Dorbar Hima.
Ym don san snem ha ka nongrim synshar khadar u Khasi, lada don ka jingujor lane ka jingleh bakla na ka liang u Khlieh Nongsynshar ki ‘khun ki hajar’ ki lah ban weng ia kitei ki khlieh nongsynshar ha kano kano ka por.
Ha ka synshar khadar u Khasi kiba shah jied ki dei kiba don ka jingshaniah, ki riewdonburom, kiba don ka jinglong kaba khuid ba suba, kiba long kiba kit ba bah ia baroh ki nongshong shnong, ia baroh u khun u hajar, ki jied ia uba ioh ia ka mon uba bun ba lang, ym da ka jingiathep vote lane ka jingia kanbas. Ym don jingpynlut spah ban long nongialam shnong, lane nongialam kur, ne ban long Myntri, ne ban long Syiem, Lyngdoh, bad Sirdar. Katba ha ka synshar paidbah jong ka Ri India bad kiwei kiwei lada tam tang shi vote ruh la ong ba ka dei ka majority bad u la jop. Bun sien ngi shem ba ha kata ka synshar paidbah ka Ri India bad kiwei kiwei ki Ri ki bishar shwa ia ka jingdon spah ym ia ka nongrim jong ki nongmihkhmat. Kumba ka long mynta baroh ki nongmihkhmat ha ka synshar Ri India ki hap pynlut da ki phew lak da ki phew crore ban pyrshang ban mih kum ki nongmihkhmat.
Kitei haneng ki long ki jingiapher hapdeng ka synshar paidbah jong ka Ri India bad ka synshar khadar jong ka Dorbar u Khasi. Napdeng ki 53 tylli ki Hima /Elaka hapoh ka Ri Khasi bad ha ki 19 tylli ki Elaka hapoh Jaintia Hills dang bun kiba bat skhem ia kitei ki Riti ki Dustur, ki don katto katne ki Hima /Elaka kiba la shong nongrim da kaba jied u paidbah, hynrei ha kitei ruh ki dei tang kito ki khun ki hajar jong kato ka iit ka Hima/Elaka.(SP News)
