Shillong, Naitung 27: Ka seng Federation of Khasi Jaintia and Garo People (FKJGP) hynne ka sngi ka la kynduh ia u bah Pyniaid Sing Syiem u ba dei u chef executive member (CEM) ka Khasi Hills Autonomous District Council, ban ia kren halor ka jingdonkam ban pynkhlaiñ ïa ki aiñ ki dorbar shnong ban tehlakam ïa ka jingwan rung khyrthlep ki bar jylla hapoh ki shnong ki thaw.
U bah Dundee Khongsita ha ba kren sha ki lad pathai khubor u president ka FKJGP, ula ong ba dang shen ka Executive Committee (EC) ka KHADC ka la mynjur ban pynkhlaiñ ia ki ain dorbar shnong bad na ka liang ka seng ka kyrshan ia kane ka rai, namar ka la dei ka por ban pyrkhing ia ka jingwan buhai shnong ki bar jylla ha man la ki shnong.
U bah Dundee u la ong ruh ba na ka liang ka seng ka kyrshan bad kan ai ruh ka jiang iatreilang bad ka KHADC na ka bynta ban pynkhlaiñ ia ki aiñ, ki dorbar shnong ban pyrkhing ia ka jingrung jingmih ki bar jylla sha u pud u sam jong ki shnong ki thaw.
Nalor kane u bah Dundee. U la ong ba, Ka seng ka la pynsngew sha u CEM halor kine kiei ki sienjam ba ka KHADC ka donkam ban shim ban pynkhlain ia ki aiñ ki dorbar shnong ban pyrkhing ia ki briew ba wan na bar jylla ban buhai shnong namar ki don ki katto katne ki bar jylla kiba la ioh ruh ban thep Vote tang katto katne sngi ba ki wan buhai shnong
U bah Dundee u la ong ba na ka liang ka seng ka la iakren ruh bad u CEM ban pynthikna ba ka council kam dei shuh ban dang ai Trading License ia ki bar jylla khlem da bishar bniah ia ki kot ki sla namar ki trai ri trai muluk ki la lah ban trei ia bun jait ki kam.
U bah Dundee u la ong ba na ka liang ka seng ka kyntu ia u CEM ban ym ai shuh ki Trading License ba thymmai ia ki bar jylla bad ban ailad ia ki trai ri trai muluk ban trei
Nalor kane u nongialam ka FKJGP u la iathuh ba ka seng ka la iakren bad u CEM ban thaw ïa ki aiñ shnong kiba khlaiñ ban tehlakam ïa u drok bad kiwei kiwei ki jingsniew.
