Shillong, Nailar 19: Ka jingpynmih ia ki hukum ban khan iew, khang shnong lane khang dukan syndet syndet lane shimiet shimiet jong ka sorkar jylla la bun bun sieng ka long kaba ktah bha ia kiba bun. Ka seng ka sngewthuh ba donkam ban khangdam Lada donkam ban iada na ka jingpur u khniang covid-19.
U Bah Thomas Passah President ka Youth Wing jong ka KHNAM u la ong ba ki sngew ba ka sorkar kadei ban kiar na ka jingpynjari syndet syndet khlem poi pyrkhat ia kino kino ki jingkhang Shnong khang thaw, namar kiba bun ki ba kamai kajih ki duhnong bha khamtam kito kiba die ia ki marbam mardih. Ka sorkar kadei ba ai por kumno kumno ruh shi sngi khnang ba ki nongdie jingdie kin ym lutsan.
Ka ne ka kyrwoh ka long halor ka jingpynmih hukum ka sorkar jylla ban khang ia ki katto katne ki bynta kiba don hapdeng sor haka step jong ka 19 tarik mynta u bnai. La sakhi ba mynstep ki dukan ki plie kumba la bthah ka sorkar, hynrei syndet syndet la phah khangdam bad kiba bun ki la shu sah ha ka umdum.
Ka seng ka pynsngew ruh sha ka sorkar haba pynbna positive ia u ne ka briew dei ban pynthikna shwa namar la sakhi ba ha ka test report kaba nyngkong la pynbna ba dei positive hynrei haka test report kaba ar(kaba long kaba kham bniah) pat la pynthikna ba dei negative.
Lada iano iano ruh la pynbna positive da ka sorkar la sngewthuh ba ka stigmatisation ka don beit bad ngim iohi ba ka sorkar ka lah ban leh eiei halor kane. Ka jingbym pyntip ia ki kyrteng kiba ioh ia u Covid-19 ka wanrah ia shibun ki jingkylli bad ka pynmutsniew ioh kadon eiei kaba sharieh.
Kumta sa shisien ka seng ka kyntu ia ka sorkar badei ban pyntip ia ka kyrteng kiba ioh covid. Ka jingburieh ia ki kyrteng da ka sorkar halor ka nongrim ban lait na ka stigmatisation ka long ka bymdon nongrim namar la sakhi ba marsien pynbna positive ka shnong ka thaw marjan marpa kiba ithuh ithaw terter ki la tip lupa hi bad kiba lah ban stigmatised ki dei kine hi, namar ymdon balah ban stigmatise Lada ym ithuh. Kane ka jingburieh ia ka kyrteng ka lah ban long naka bynta ka jingmyntoi ka sorkar ym naka bynta ka jingmyntoi u paidbah.
Ka sorkar ka pynbna man ka sngi ba katno ngut ki ioh covid bad katno ngut ki koit, Hynrei namar ka jingburieh kyrteng ka sorkar ka pynmutdur ioh ki kyrteng kiba ka sorkar ka pynbna Kum ki positive kidei kiba mih result positive ha ka test kaba nyngkong bad kiba ka sorkar ka pynbna kum Kita kiba la koit kidei kiba mih negative haka test report kaba ar, test lada ki khlem pang Covid kumno ka sorkar Kan Ong ba ki la jem.
Ka seng ka ban jur ba ka sorkar kadei ban pynmih kyrteng khnang ba Kan don ka jingkhuid jingsuba khamtam halor ka Pisa tyngka kiba ka sorkar ka pyndonkam khnang ban lait na ka bamsap .
Lyngba kane ka kyrwoh ka seng ka pynpaw ruh sha u paidbah ba kadei ka jingshisha ba baroh ngi don hapdeng ka jingsheptieng bad ka jinglynga hynrei kumba ka long mynta ka bynta kaba kongsan ka dei ka jong ngi Kum u paidbah kumno ban pynpher ia ka rukom im da kaba bud ryntih ia ki jingbatai jong ka tnat ka koit ka khiah.
