Shillong, Jymmang 04: ka North Eastern Council (NEC) kala pynlong ia ka jingialang kaba kyrpang ha Chandigrah ka nongbah jong ka jylla Harayana ban ia kren kumno ban pyniaid iew ia ki dawai kynbat jong kane ka dang shatei lam mih ngi jong ka Ri India.
Ia kane ka jingialang kaba ar sngi lynter la plied a u Dr Jitendra Singh myntri khynnah jong ka sorkar pdeng u ba dei peit ia ka DONER ministry. Haka jingkren plie ka jong u u la on ba ka jingpynlong ia kane ka jingialang kaba ar sngi ka long ban pyni pyrthei ia ki dawai kynbat jong ka dong shatei lam mih ngi jong ka Ri India sha kiwei ki bynta jong ka Ri.
Ha kane ka jingialang ki nongiashim bynta kiba la ia poi ki long na baroh ki jylla jong kane ka thain shatei lam mih ngi jong ka Ri India bad kum juh na kiwei ki jylla jong ka Ri. Ia ka jylla Meghalaya la ialam da ka kong R Lawai kaba dei na ka Medicinal plants Boards bad kiba la ia shim bynta ka dei na ka Seng Nongsumar Dawai Khasi Nylla (SNSDKN) ia kaba la mih khmat da u Bah S Nongrem bad ka kong Costina Dkhar.
Ka phang pdeng jong kane ka jingialang kaba ar sngi kaba la pynlong da ka NEC ha katei ka nongbah ka long ban plie kalad ka lynti kumno ban pyniaid iew ia ki dawai kynbat jong kane ka thain shatei lam mih ngi sha kiwei ki bynta jong ka Ri India. Ha kane ka jingialang kiba la poi ki long na ki company bapher bapher kiba don ha ka Ri kiba pynmih ia ki dawai kynbat.
Ka MP jong ka Chandigrah sha ka Lok Sabha ka Kiron Kher kala ia don lang ha kane ka sngi plie ia kane ka jingialang kaba la long dang shen, kiwei ki heh sorkar kiba la ia don lang ki long u Naveen Verma Secretary ka DONER Ministry, u SN Pradhan Joint Secretary ka DONER Ministry lem bad kiwei kiwei ki heh sorkar, la ong u nongai buit ba rangbah ka seng SNSKDN u Dr Herbert Bani ha ka kyrwoh kaba la phah sha ki lad pathai khubor.
