Shillong, Iaiong 10: U Chief Electoral Officer jong ka jylla Meghalaya u P Naik u la ong ba ha dien ba la ioh ia ka jingkhein kaba bniah bha ha kaba ia dei bad ka jingthep vote kaba la long ha ka 9 tarik mynta u bnai ban jied ia ki nongmih khmat na ki ar tylli ki MP LS ha kane ka jylla Meghalaya la shem ba ka long 68.97 percent kiba poi thep vote ha ka jylla baroh kawei.
Ka jingpoi jong ki nongthep vote kala kiew da 5 percent na ka elelction kaba long ha u snem 2009. La iathuh ba ha u 2009 ka jingpoi jong ki nongthep vote ka long tang 64 percent katba mynta kala kot sha ka 68.97 percent. Ka duna tang shi percent na kaba ki khmih lynti.
Kiba bun eh ki paidbah kiba la ia poi sha ka jingiathep vote ka dei ka South Tura ha kaba kala kynjoh sha ka 87.19 percent, kaba duna eh ka dei ha Pynursla Assembly Constituency ka long tang 52.65 percent.
Haba shim ia ka jingpoi jong ki nongthep vote ha GaroHills ka long 78.84 percent katba ha Khasi Hills ka long tang 63.06 percent. Kane ka election kaba long ha Meghalaya ha ka 9 tarik mynta u bnai ka dei ka bynta kaba ar jong ka MP Election sha ka iing dorbar parliament.
Na ka liang jong u CEO u la pynpaw ia ka jingsngew nguh ia ki paidbah kiba la ia mih ban jied ia ki nongmih khmat ha kaba ka elelction kala long kaba iaid beit iaid ryntih. Wat hapdeng ki jingkhot pakhang shnong hynrei ki paidbah kila ia mih ban pyndep ia ka kam jong ki ban jied ia ki nongmih khmat.(SP News)
