Jowai, Jymmang 17: Ki nonghikai skul Lower Primay bad Upper Primary kiba hap hapoh ka Mukhla bad Khliehtyrshi cluster ha ka 12 tarik mynta u bnai ki la pynlong ia ka program kaba kyrpang ban pynkup burom bad ai khublei ia ka Sutanuka Deb kaba long ka District Coordinator jong ka Society for Action in Community Health (SACH) bad ka water sanitation and hygiene (WASH) ha BTC Lower Primary School Thadlaskein West Jaintia Hills.
Kane ka jingpynkup burom ia ka Sutanuka Deb ka long halor ka jingshimkhia bad trei shitom jong ka kum ka District Coordinator ban pyntrei kam hok ia ka scheme ha kaba ia dei ban pynioh painkhana sha ki 52 tylli ki skul kiba la shah jied hapoh ka thaiñ East Jaintia Hills District bad West Jaintia Hills District ban ioh jingiarap lyngba katei ka scheme.
Ka Sutanuka haba ai jingkren ha katei ka sngi ka iathuh ba kumba ka long mynta kitei ki skul kiba ioh jingiarap ban tei ia ki painkhana ha ki skul jong ki lyngba ka SACH bad WASH, kiba bun la dep ban pyndep ia ka jingtrei bad la la ioh ban pyndonkam ia ki, kaba long ka jingmyntoi kaba khraw iaki khynnah skul bad kumjuh ruh ia ka skul hi baroh kawei. Ka kyntu ruh ia ki nonghikai ban kin hikai ia ki khynnah ia ka jingkordor jong ka jingkhuid jingsuba bad kumno ban leh khuid ha ka jingim jong ki kaba manla ka sngi, khamtam ba kim dei ban leit painkhana kat shaba lap namar kane kan ktah bha ia ka jingkhoit jingkhiah jong ki bad ka shnong hi baroh kawei.
U Babu Kyllimot Lhuid Asst Headmaster Ladmukhla UPS uba pyniaid ia katei ka program ha ka jingkren jong u, u ong ba ka District ka donkam ia ki briew kum ka Sutanuka kiba treihok bad shim ka jingkitkhlieh ia ka kam ba la bynshet ha ki. U kitbok kitryiang ia ka ba kan nang lah ban shakri kham bha ban wanrah ia ka jingkhuid jingsuba hapoh East Jaintia Hills bad West Jaintia Hills District ha ki por ba nang wan.
U pynpaw ruh ka jingsngewnguh bad ai khublei kyrpang iaka HDFC Bank Jowai naka bynta ka jingbei pisa ia kane ka jingthmu ban pynurlong ia kine ki kam. ka SACH bad WASH kadei ka scheme kaba iarap ban pynioh um bad paitkhana ha ki skul.
