Shillong, Nohprah 13: Hadien ba ka Central Executive Committee (CEC) jong ka Meghalaya SSA Schools Association(MSSASA) Central Body ha ka 9 tarik mynta u bnai ka la shim ia ka rai ban pdiang ia ka hukum halor ka jingpynkiew tulop ia ki nonghikai SSA hapoh ka Jylla ba la pynmih ha ka 31 tarik , Risaw, 2016 da u D. P. Wahlang State Mission Director SSA-SEMAM uba long ruh ha ka juh ka por u Commissioner bad Secretary ka tnat pule puthi ka Jylla.
Na ka liang jong ka Synjuk kan sa pynlong ia ka jingialang jong baroh ki nonghikai SSA ha ka Jylla ha ka 16 tarik mynta u bnai hapoh Khasi National Durbar Hall Mawkhar, Shillong ha ka por 11 baje mynstep ban shim ia ka rai ba khadduh na ki nonghikai kaei ki don ban ong la ki mynjur ne em bad ka rai jong ka CEC shwa ba ka MSSASA – Central Body kan leit buh ia ka jingthoh sha ka Sorkar Jylla.
Kumta ka Synjuk ka khot ka wer ia baroh ki nonghikai SSA ban pyllait por khnang khnang ban wan sha ka jingialang ha katei ka sngi khnang ba ka Synjuk kan lah ban leh ia kaba donkam ha ka por ba biang, ong a u bah Aristotle C. Rymbai President ka MSSASA – Central Body.
Ban shu pynkynmaw ka Meghalaya SSA Schools Association (MSSASA) Central Body ka la dawa na ka Sorkar Jylla ban pynkiew tulop ia ki 12, 481 ngut ki nonghikai SSA naduh ka 2 tarik Rymphang , 2016 , la sakhi ruh ia ka jingialang bah ha nongbah Shillong ha ka 15 tarik Iaiong , 2016 ha kaba ki nongialam ka Association of SSA-RMSA Teachers of India u Arvind Rana bad u Ajay Upmanyu kila don lang ban kyrshan ia ki nonghikai SSA ban pynbor ia ka Sorkar ban pynurlong ia ki jingdawa .
Ka MSSASA – Central Body ha ka 18 tarik u Naiweng ka la leit ban ia kynduh ia u Prakash Javadekar Myntri ka Human Resourse Development (MHRD) ka Sorkar Pdeng ban iakren halor ka jingpyniapher ka Sorkar Jylla ia ka tulop thymmai ki nonghikai SSA. Kane ka long katkum ka kyrwoh kaba la phah da u Bah Aristotle C. Rymbai PresidentMSSASA – Central Body.
