Shillong, Jylliew 9: Hadien ba ki pulit ka jylla kila kem noh ia kiba suba donkti ban pyniap ia u Raja Raghuvanshi ha ka thain Sohra, u Myntri ka tnad jngohkai pyrthei u Bah Paul Lyngdoh u la ong ba baroh kiba donkti ban pynbudnam sniew ia ka jylla Meghalaya kin sa ngat ha ka ain.
Haba ia kren bad ki ki lad pathai khubor, u Bah Paul Lyngdoh u la ong, ki jaka jngohkai ha ka jylla ki dei kiba shngain bad ka jingjia jong ka jingshah pyniap u Raja Raghuvanshi kadei ka jingjia kaba la jia ha ka sien kaba nyngkong eh kaban jia hapoh Sohra.
Ha kaba iadei bad ka jingpynbudnam sniew ne pynthoh bria da ki lad pathai khubor ne ki National Media, u Bah Paul Lyngdoh u la ong ba ka sorkar jylla kala khmih bha.
“Ka sorkar jylla lyngba ka tnad pulit kala dep rejistar ia ka Ejahar bad ngin sa iaid shakhmat ruh bad ki lynti jong ka ain ban pynthikna ba kine kiba pynthohbria ia ka dur jong ka Meghalaya kin shah pynshitom katkum ka ain” ong u Bah Paul.
Shuh shuh u Bah Paul u la ong, ka sorkar kan sa khmih bniah ia ka jinglong jingman baroh bad ban kyntiew ia ka Standard Operating Procedures (SOP) na ka bynta ka jingshngain bad jingiada ia ki nongjngohkai.
Na ka liang u Superitendent of Police ka East Khasi Hills u Bah Vivek Syiem u la iathuh ba ki pulit kila dep ban shim da ka ‘suo motu case’ pyrshah ia u wei u briew uba byrthen ban leh eiei ia ki briew kiba napoh ka jylla hynrei kiba don pat shabar ka jylla.
