Shillong, Iaiong 07: U Bah Wanphrang K Diengdoh u nong pynmih bad Direct ia ka phlim kaba la jer kyrteng “ where the clouds end” yn pyni paidbah ia ka ha ka sien kaba nyngkong ha ka sngi thohdieng mynta u bnai ha Don Bosco Youth Centre Shillong.
Ia kane ka documentary la lah pyni ha ki jaka bapher bapher ha India kum ha Delhi, Mumbai bad kumjuh ha ki Skulbah (University) ha Europe, South America bad Australia.
Kane ka documentary ka thmu ban pashat jingmut halor ka jaidbynriew kaba iaksaid hapdeng ka jylli ba iar bad ki jingiatyngkhuh bad kiwei pat. Hato kane ka jingiatyngkhuh ka kyntiew ne ka pynshong syier ia ka jaitbynriew?
Kane ka documentary ka mih na ka jingshem jong u nongshna uba shakhi ia ki jingjia kiba bun ha ka liang ka shongkha shnongman, ka ai jait ai khong, ka synshar khadar, ka naim ka rukom, ka khaii-pateng, ka riti ka dustur, kaba ka jaitbynriew ka ngeit ba ki dei ki nongrim tynrai jong ka.
Niuma, ki mih shibun ki jingkylli haba ngi iatai halor kitei ki mat kiba lehse kiba ngin ym lah ban ioh ka jubab. Kane ka documnetary kan pynthut ia ki jingmut jingpyrkhat namar ba wat ia ka mynnor ruh ngin hap ban tynjuh bad ban thir bniah.
Ia kane ka documentary la pynbit pynbiang da u Wanphrang Diengdoh. U dei uwei na ki nongshna phlim kaba ka Bri Hynniewtrep ka la pynmih.Ki phlim kiba u la pynmih ki la ioh khusnam ha la ka Ri bad kylleng ka pyrthei.
Ia kane ka phlim la direct da u Bah Wanphrang K. Diengdoh bad ia ka sien kaba nyngkong ynsa pyni paidbah ha Don Bosco Youth Centre Shillong ha ka por 4.30 baje jan miet.(SP News)
