Shillong, Naitung 16: Ka a5 tarik Naitung la ong ba kan long shisha ka sngi ka ban sah jingkynmaw ha ka khana pateng jong ka Iewpomtiah, Nongkrem, Khyrim Syiemship, namar ha dien ka jingphiah bad shah pynduh noh ia ka Laitkroh Constituency ka Shnong Iewpomtiah kala hap ban ia tyngkhuh ia kiba bun ki jingtynjuh ha kiba bun ki liang, hynrei ka katei ka sngi u CEM jong ka KHADC u Bah PN Syiem u la lie tban plie ia ka iing dorbar shnong. Ha kaba u MDC jong kane ka jaka u Bah Banteidor Lyngdoh u la ia don lang kum u EM jong ka Council.
Ha kane ka juh ka sngi na ka liang jong ka dorbar shnong Iewpomthiah kila pynlong ruh ia ka jingpynkup burom ia ki khum samla kiba la pass bha ha ki exsamin ka jong ki kum ka HSLC bad ka SSLC, la kit bok ia ki ba kin iaid shaphrang ba kin sain dur ia ka lawei.
Haba kren kum u Symbud Kongsan ha katei ka sngi u Bah Banteidor Lyngdoh EM I/c Labour& Youth Affairs, u ba dei ruh ha ka juh ka por u MDC Mawkynrew Constituency u la ong ba ki Paidbah Nong Shnong Shnong jong ka Nongkrem Constituency kim dei satia ban sngew ba ki la shah ieh khunswet namar ba kane ka EC jong ka PDF hapoh ka jingialam jong u Bah Pynshngain N Syiem kum u CEM ka dei ka kaba don ia ka thong kaba shai bad kaba iohi jngai ban buh shwai aka Jaid bynriew hakhmat bad ban pyndep ia la ka jong ka kamram ban pynurlong iaka jingangnud jong ki paidbah.
U Bah Pynshngain N Syiem, CEM, KHADC haba kren ia ka bynta kum u Kongsan ha katei ka sngi, u la pyn kynmaw ia ki jingeh bad ki jingtynjuh ia kaba kum ka Jaid bynriew kala mad ha kine ki snem kiba la leit noh, hynrei u la ong pat ba dei lyngba kine ki jingeh bad ki jingtynjuh baroh kala phrang pat ia ka mynsiem ba shynrang ban thom bad ban tur shaphrang ban beh ruh sha pyrshah jong kadak ban saindur ia ka lashai.
U Bah Pynshngain u la ban jur ruh ba kum ka Jaid bynriew ka dei satia ban klet ia la ka jong kaThymmei, ha kaba da ka mynsiem kaba sngewkhia u la pyn paw ba kiba bun ki Nongmih khmat Paid bah ha kine ki sngi ki pyrkhat tang na ka bynta jong u snem 2018, hynrei ki klet noh pat ban saindur ia la ka jong ka jaidbynriew.
U Bah Pynshngian u la kynnoh ruh ba bun na ki nongmih khmat ynda kila long MLA bad minister ynda kila shoong ha secretariat ki klet noh ia la ka jong ka thymmei, da kaba kwah ban pynwandur ha ka rukom jong ka Municipal bad Panchayat, ka jingpyrkhat ban trei na ka bynta ka jaid bynriew kam dei ban long tang unda la jan elelction.
Ban pynphuh pynphing ia kane ka sngi la don lang ruh shibun ki riew rangbah na kane ka shnong bad kala don ruh ka jingrwai bad jingshad na ki khynnah skul jong kane ka shnong.
