Shillong, Iaiong 13: Ka 61 Meghalaya NCC Girls battalion kaba dei jong ka Shillong College mynta ka sngi kala pynlong ia ka Digital Payment Campaign hapoh jong katei ka college ha kaba palat 500 ngut ki NCC bad kumba 100 ngut na ki dkhot jong ka NSS kila wan ban ia shim bynta ha kane ka jingia kynduh lang.
U Principal jong ka Shillong College U Dr. K. D. Ramsiej, ha ka jingkren ka jong u u la ong ba ka jingiadon bynta lang hapoh jong ka NCC ka dei kawei pat ka bynta kaba lah ban saindur ia ka jingim jong u briew, kane ka long katkum ka jingshem ka jong u.
U Commanding Officer jong ka 61 Meghalaya Girls Bn.,Col.P. C.Pawar u la ong ba ka jingjied ia ki briew ba kin ia don bynta ha kane ka jingialeh ban pynshlur kumno ban pynkupbor ia ki briew da kaba pyndon kam ia ki juk stad kiba mynta ha kaba ia dei bad ka jingnang jingtip bad kumno ban pynsngewthuh lem ia kiwei ban wanrah ia ka jingshngian ha kiba bun ki liang.
Ka SBI Chief Manager, Region 1, ka Lalnilawmi, ka la ong ba ka jingpynlong ia kane ka jinghikai ka long ban pynsngewthuh sha ki paidbah ia ka jingangnud jong u myntri rangbah duh jong ka Ri ban pynlong ia ka Ri India kaba bit ba biang ha ka jingpyndon kam ia ki kor ki bor jong ka juk stad kaba mynta ha kaba ia dei bad ka ia siew ia tda.
Ha kane ka por ba don kane ka jinghikai ki dkhot jong ka NCC kila don kiba shim ia ka BHIM App ba kin dup sngewthuh kumno kane ka rukom transfer ia ka pisa, ha kane ka sngi la pynshai ruh ia ka rukom pyndon kam ia SBI Buddy app ban iarap ia ki ha ka rukom phah pisa.
Katba na ka liang jong ki pulit pyniaid kali na Rynjah Police station hapoh ka jingialam jong u K D Marngar,Inspector, u SI T.N. Marak bad u constable B.N. Dkhar kila batai ia ka rukom kumno ban leh ha kaba iaid ha surok ban konguh ia ki kyndon pyniaid kali bad ban pyndon kam ia ka bor sngewthuh lade. La kyntu ruh ia ki dkhot jong ka NCC ba kin long kiba la kloi ban iarap ia ki briew ha ba ki lap haba don ka jingiatyngkhuh kali bad kane kan iarap ban pynlait im ia ki mynsiem briew.
