Shillong, Rymphang 07: Ka Seng Samla Jatah Lakadong dang shen kala pynlong ia ka Awareness Programme halor ka phang pdeng “Ka Hok ki kynthei, Ki lad jingiada & Ka jingbha jing miat na ka bynta jong ki Khynnah rit” (Women Protection & Child Welfare) ha skul St. Paul UP School, Jatah.
Ki mat kiba kongsan kiba la ioh ban pynshai paidbah bad kumjuh ruh kum shi bynta ban ai jinghikai ki long halor ka Right To Education (RTE), Act 2012, POCSO Act, Child Labour, Corporal Punishment Act, Protection of Women from Domestic Violence (PWDV) Act 2005, Sexual Harassment of Women at Workplace (SHWW) Act, Early Marriage, Integrated Child Protection Scheme (ICPS), Blood Donation lem bad kiwei kiwei de. Ki Nongkren kiba la wan ban ai jing pynshai halor kitei ki Mat ki Kynthup ia i Kong Meena Kharkongor, Chairperson SCPCR, Kong I Warjri, Coordinator State Resource Centre for Women , Bah Larry P.Warjri, President Meghalaya Judo Association lem bad kiwei kiwei ki Khraw pyrkhat bad ki riew shemphang.
Ha katei ka sngi nalor ka jing pynshai paidbah halot katetei ka phang pdeng“Ka Hok ki kynthei, Ki lad jingiada & Ka jingbha jing miat na ka bynta jong ki Khynnah rit” (Women Protection & Child Welfare) la ioh ruh ia ka jing iamir jingmut ha kaba na ka liang jong ki paidbah ki la buh ia ki jingkylli ban ioh ia ki jing pynshai kiba kham bniah
La Pynshngain bad ai mynsiem shuh shuh ia ka Seng Samla Jatah Lakadong da ka jing ia don rynkat jong u Bah Banteidor Lyngdoh, MDC Mawkynrew Constituency. Haba kren kum u Kongsan ha katei ka sngi na ka liang jong u Bah Banteidor Lyngdoh, u la ai jingiaroh shikatdei eh ia kane ka sienjam ba la shim da ka Seng Samla Jatah Lakadong ban pynlong ia kum kine ki Awareness Programme da ka mynsiem jong ka jingkitkhlieh bad ka jing iohi jngai ban saindur ia ka lawei da kaba bynrap ruh ba kum ka pateng bynriew kaba mynta ngi im ha ka juk jong kiba bun sa tang da ki jingeh bad ki jingialeh.
Da ka mynsiem kaba sngewkhia u la pynpaw ia ka jing bynniaw ba Ki jing jia kiba sniew bad ki ei kiei kiba i saitmet ki la pynhiar dor ia ka jinglong kyrpang jong ka jaitbynriew bad kiba bun ki jing jia kiba sniew ki la iai jia ym tang sha ki bynta jong ki jaka sor hynrei kala sdang pur wat sha ki bynta jong ki Shnong Nongkyndong ruh kumba ngi la iohi bad sakhi lyngba jong ki lad pathai khubor na ka por sha ka por.
U Bah Banteidor u la ong ba kane ka dei ka por kaba dei eh ban kyrsiew thiah ia ki paidbah nong shong shnong lyngba kine ki Awareness programme khnang ba kum ki Long ing long sem kin don hapdeng ka jing shong suk shong shngain da kaba tip iala ka jong ka Hok ban ban sngewthuh iala ka jong ka kamram khang ba kum ka jiatbynriew ngin lait na ki jingeh bad ki jing shah Thombor.
Ha katei ka sngi na ka liang jong U Bah Banteidor kum ka dak ban ai mynsiem ia ki Longing kiba don hapdeng ka jingduk jing kyrduh Khynnah hynrei kiba don pat ka jingthrang bad ka jing angnud ban saindur ia la lawei jong ki Khun ki kti ban pynioh ia ka jing nang jingstad kaba Paka, na ka liang jong u Bah Banteidor u la noh jing iarap ruh sha 15 tylli ki long ing jong ka Shnong Jatah Lakadong ban kyrshan skul.
