Shillong, Naitung 09: Ka jingïalehkai football kaba heh tam ha ka ri ka la wanphai biang sha ka nongbah Shillong, ha kaba u Myntri Rangbah ka jylla Meghalaya, u Conrad K Sangma, u la plie paidbah ia ka 134th Indian Oil Durand Cup ha State Convention Centre.
U Myntri Rangbah u la pynpaw ka jingsngew sarong halor ka jinglong ka Shillong kum kawei na ki jaka pynlong ia kane ka jingïalehkai, ha kaba yn pynlong phra tylli ki jingïakhun ha J.N. Stadium, kynthup ia ka quarter-final bad semi-final.
U la pynpaw ruh ba ha ki 7 snem ba la leit, ka sorkar ka la pyntrei ia palat 70% ki sports jingtreikam, bad la thied palat ₹2000 klur na ka bynta ka roi ka par ha ka liang ka sports. U La pynbna ruh ba yn tei ia ka Mawkhanu Stadium kaba heh tam ha India, bad kyntiew ruh ia kiwei pat ki complex ha Tura, Jowai, bad Shillong.
U Myntri Sports, u Shakliar Warjri, u la ong ba ka sorkar ka la mang ₹39.17 klur sha ki 26 sports associations ban pynkhreh na bynta ka National Games 2027, bad buh thong ban rah haduh 50 takma.
Ka Durand Cup ha kane ka snem kan sdang naduh ka 23 tarik u Naitung haduh ka 23 tarik u Nailar 2025, ka ban pynlong ha ki san tylli ki jylla West Bengal, Jharkhand, Assam, Manipur bad Meghalaya.
