Jowai, Jylliew 24: Ka Jaintia Youth Federation JYF Sengkmie, kam lah ban shu sngap jar ia ka jingkuman jong ka Sorkar Jylla. Imat ka Synshar ka khadar mynta ha Meghalaya ka la kylla long kum ka kawei na ki kam khaii ne business ka ba khraw bha mynta ha kane ka Sorkar ka ba la ialam da ka Congress ha Jylla kham tam ia kito ki Politician kiba bat ia u lakam ka synshar khadar hapoh ka Jylla, wat ban thok bad ban burieh ia ki jing shisha ruh kim salia ne sngewsang pap haba ka pyrthei ka tip bad iohi lut baroh ki dang kwah ban ia ksaid kat lah kat iai ban pynpaw ba ki dei ki nongbishar kiba stad, ba dei na kane ka daw ba ka synshar ka khaddar hapoh ka Jylla kam ju long kaba iaid beit iaid ryntih hynrei kaba shu kdup beit tang ban ioh pynksan ia ki heh spah company kiba la wan
pynieng kharkhana beain ha jaintia Hills District.
Kat kum ka kaiphod ba khyllie madan da u Comptroller & Auditor General CAG ka la lap ba ki phra tylli ki Company pynmih dewbilat ha Jaiñtia Hills ki la pynkheiñ ia ki kyndon jong ka Forest (Conservation) Act, 1980, ha kaba ki treikam khlem da ioh jingbit na ka Ministry of Environment and Forest (MoEF) watla ki karkhana (project) ki don ha ki jaka ba rben bha ki khlaw (Thick forest areas).
Haba iadei bad ki Karkhana Dewbilat hapoh Ri-Lum Jaiñtia u bah P.L Majaw President jong ka JYF Sengkmie u ong ba ‘Pleng dei ki Politician kiba ialeh bussiness khlem jingsalia ban pyrkhat lem ia ka jingjot jingjulor ki khlaw ki btap kiba ai jingim ia ki briew’. Kane ka kaiphod jong u CAG (for the year ended 31 March 2011) kala pyn thikna ba ki Politician kiba synshar ia ka Jylla kila die lilam ia ki khlaw ki btap bad ia ka Jylla tang ban ioh kdup ia ka spah ka tyngka pliah jong ki kharkhana dewbilat. ka ba la kdew shai ba kane ka jingailad jong ka Sorkar Jylla ia kitei ki phra tylli ki Company pynmih dewbilat ban pynkheiñ aiñ kat ba ki mon, ka wan rah pynban ka jingduh nong ka ba khraw ia ka Jylla ka ba la kot haduh T. 43.45 klur kat kum ka kaiphod jong u CAG ong u bah Majaw.
Ha ki snem ba lah dep ha ka January 10th, 2012 u Myntri ka tnad khlaw bah Prestone Tynsong u ong ba u shim khia bha halor ka jingpynkhein ain ki kharkhana pynmih dewbilat, da kaba byrngem ba ka sorkar kam salia ban pynshitom ia ki tei ki 8 tylli ki cement company kiba la pynjot pynjulor ia ki khlaw ki btap, ki Um ki wah da ka ba pynkhein ia ka kyndon ain Forest Conservation Act, 1980 hapoh ki khlaw ba rben jong ka Jylla (Thick” forested areas). Kumjuh ruh u byrngem ba shisien ba lah lap ha ka jingtohkit, ym tang ia ki cement company ban pynshitom hynrei ia baroh kito ki ophisar kiba don jingkit khlieh ban ai jingbit lane NOC sha kitei ki kharkhana pynmih dewbilat ban khlow mawshun ha ki jaka ba dang dei ka jaka klaw.
Na ka liang u Myntri ka tnad Khlaw bah Prestone tynsong ka ei mynta kumba u la byrngem, halor ka jinglap jong ka Comptroller and Auditor General CAG ba ki kharkhana pynmih dewbilat ha ka Jylla ba ki pyndonkam ia ki 16 tylli ki tnad ne nongtih mawshun beain khlem da ioh ia ka jingbit na ka tnad Sorkar Pdeng jong ka Ministry of Environment and Forest (MoEF) ban leh ia ka tei ka kam, lait noh tang kawei ka company ba ioh jingbit ban tih mawshun na ka MoEF (Lafarge), kiwei kiwei ki kompani ki khlem ioh satia ka jingbit ban tih mawshun na ka MoEF kaba long ka kyndon ba dei ban ioh jingbit na katei ka tnad pynpaw ka kaiphod CAG. Halor kane, ka kaiphod ka la ai jingmut ba dei ban pynsangeh noh ia ka jingtih mawshun da kito ki tnad ne kynhun ne kharkhana rit ba la pyndonkam da ki kompani tih mawshun khamtam ha kito ki jaka khlaw sorkar ne wat ki jaka khlaw paidbah ruh.
Ka High Level Committee kaba kynthup ia u Additional Principal Conservator jong ka ka tnad kam khlaw na ka MoEF bad kumjuh ruh u Conservator jong ka tnad kam khlaw na ka jylla, ki la lap ba 38.11 Hectare ka jaka na ka 42.87 Hectare ki dei ki jaka ba hap hapoh ki ` law kyrpang .Ia kane la shim halor ka nongrim kat kum ka kyndon ain Mineral Conservation and Development Rules 1988. Ka kaiphod jongka CAG ka la kynthoh pyrshah ruh halor ka jingbym lah jongka tnad Meghalaya Mining and Geology ban pyndam ia katei ka jingai wai ia kitei ki khlaw ban tih maw shun bad kumjuh ruh ban shain kuna ia kitei ki kompani kiba iaid laid ia ki kyndon ka MoEF kaba long ka jingpynkhein ia ka Forest (Conservation) Act 1980.
Ka jingleh bussiness jong ki Politician ba don ha ka bor synshar, ka long ba kumno ki nud ban ai jingbit ia kitei ki karkhana dewbilat ba kin pynieng karkhana bad tih par mawshun ha ki jaka khlaw jong ka Khliehriat Sub-Division, kaba long pyrshah ia ka aiñ jong ka Sorkar Kmie bad ka hukum jong ka Supreme Court.
“Ka Section 2 jong ka Forest Conservation Act, 1980, ka kdew shai ba ka jingpyndonkam ia ki jaka khlaw na bynta kino kino ki kam ki bym iadei bad ki kam khlaw, ki donkam ban ioh ia ka jingmynjur na ka Sorkar Pdeng (Forest Clearance Certificate ) hashwa ba kin tei ia ki kharkhana jong ki,” ong ka kaiphod u CAG. ” kumjuh ka jingleit jurip bad tohkit da ki ophisar ka tnat MoEF napoh ka North Eastern Regional Office (NERO), Shillong, ia kitei ki karkhana dewbilat ha Jaiñtia Hills ha u Jymmang bad Jylliew, 2010, ka lap ba ki phra tylli ki karkhana dewbilat kim shym la ioh jingmynjur (Forest Clearance Certificate) satia na ka Sorkar Pdeng hashwa ba kin treikam bynrap u bah Majaw,”
Ka JYF ka ong ba ka sorkar ka dei ban khang tala noh shi syndon ia kine ki phra tylli ki karkhana dewbilat ha Jaiñtia Hills namar kila pynkheiñ ia ka aiñ jong ki khlaw ki btap bad ha juh ka por ruh ka seng ka dawa ba dei ban dain kuna bai lutksan kat kum ka jingjot jing julor jong ka mei mariang. Kane ka jingdawa jong ka Seng ka dei kaba shong nongrim bad pynmyntoi ia ka Sorkar Jylla bad kaba lah ruh ban pynksan hakhmat ka Iing Kashari namar dang shen ka Supreme Court kala pynmih ia ka hukum ban phah siew bailutksan ia ka Lafarge Umiam Pvt Ltd halor ka jingtih par mawshun ha ki jaka khlaw hapoh ki thaiñ Shella.
Kane ka kaiphod u CAG ka kdew ba kitei ki Company dewbilat kiba treikam khlem ioh jingmynjur na ka Sorkar Pdeng ki kynthup ia ka M/ S Star Cement, M/ S Topcem, M/ S Taj Cement, M/ S Best Cement, M/ S Green Valley Industries (P) Ltd, M/ S Amrit Cement Industries Ltd, M/ S Adhunik Cement Ltd bad ka M/S Goldstone Cement Ltd, Green Valley Industries Ltd, Hill Cement Company Ltd,
“Ha kine ki phra tylli ki karkhana dewbilat, ki ophisar ka NERO ki la lap ba ki babun ki Certificates kiba la ai (issue) da ki bor ba dei peit ha ki kyrdan bapher- bapher, kim don satia ka jingbatai kaba bniah ha kaba iadei bad ka jingheh ka jaka ba ki donkam, bad ym don wat tang kawei ka ‘ project’ kaba ioh jingbit (forest clearance Certificate) wat la ki don hapdeng ki jaka khlaw,” ong ka kaiphod u CAG. Ka kaiphod u CAG ka ong ba katkum ka shithi ba la phah da ka tnat MoEF ha ka 29 tarik Jylliew, 2003 sha ki Principal Secretary jong baroh ki Jylla bad Union Territories, ka la kdew halor ka kamram jong ki ha kaba iadei bad ka hukum jong Ïingbishar Bahakhliehduh ka Ri (Supreme Court) ba ka la pynmih ha 12 tarik Naiwieng, 2002.
U bah Majaw u buh jingkylli mynta hato ka Sorkar Meghalaya ba ialam da u Dr Mukul Sangma ka dei ka Sorkar jong ki Cement Company ne ka Sorkar kaban peit ia ki jingeh bad ki jingma kiba ap ia ka pateng jong ka Jylla ? u Dr Mukul Sangma (Chief Minister ba don burom), kumba phi kum u khlieh jong ka Sorkar, u dei ban shim ruh ia ka sienjam kumba la dawa ban pyndonkam ia u juh u shabuk jong ka Lafarge Umiam Pvt Ltd.
Ka jingshem jong ka CAG kala biang eh ia ka Sorkar ban ai ka jingpynsajia da ka ba khang tala noh shisyndon ia kine ki karkhana pynmih dewbilat ha Ri lum Jaintia, namar ka jingai jingbit ia ki karkhana dewbilat hangne ka lah ban dei ka scam ne ka jyrsieh kaba khraw eh, shibun kiei kiei kin sa mih madan bad paw pyrthei lut bad khlem pep ruh ba ka jingbuaid tyngka pliah bad ka jinglilam jong ki Politician ia ka Jylla kan sa paw lut ong u bah P.L Majaw President ka JYF. Ong ka seng JYF.(SP News)
