Shillong, Nailar 28: U General Secretary ka KSU Seng kmie U Samla Donald V.Thabah u la ong ba “ka ri Khasi Kam shym la laitluid hynrei ka dei kaba lait lan”, ïa kine ki kyntien da ka
jingsngew khia u la pynpaw ha ka jingialang pyntian smai bad pynskhem ïa ki nongkitkam ka KSU Kynroh Unit kaba dei ka wei pat ka tnat treikam ba thymmai jong ka seng kaba hap hapoh ka jingpeit jong ka KSU Nongthliew Circle.
U ne u nongialam ka KSU u la ong ba ka Ri Khasi haduh mynne mynta ka dang khih dang ksar ban iakhun bad ban iada ïa ka hok nongkynti u trai ri trai muluk ban shngaiñ ki Longdien, une u Samla Nongialam Ka KSU u la kren bynñiaw halor ka jinglong jong ka jylla ka bym don ïa u pud u sam uba tikna ka ba la wan rah ïa ka jingïa kajia na ka por sha ka por bad ka jylla Assam.
Kane kala wanrah ia ka jingpynrit mynsiem ruh ïa ki paradoh parasnam kiba sah sha ki thaiñ khap pud, ka jingwan rung kyrthlep ki briew na sha bar sha ka Bri Hynñiewtrep na ka por sha ka por khlem da don kano kano ka jingteh jingkhum lyngba ki Aiñ ba pyrkhing ban khang lad.La kren ruh ba lada phai sha ka kam khaïi pateng ruh la knieh da u nongwei shi sngi.
Kane ka jinglaitlan ka la pyn khuslai ïa ki samla ka KSU ha kaba kin hap durut ban sharai bad im sngi kyndong da kaba peit kmang ïa kine ki jing laitlan ba shyrkhei ki ban sa bam duh ia ka Jaitbynriew.
Une u Nongialam u la pynpaw bad kren shai ruh ba wat la ka Jylla ka long laitlan hynrei kin pyn tikna pat ba da lei lei ruh ka khyndew ka shyiap, ki riti dustur, ka synshar khaddar bad baroh ki nong kynti ka Jaitbynriew kim dei ban shah knieh.
Kum ka sentg kila la pyn khreh ban ïa khun pyrshah ïa ki nongshun la ha ka thma pyrkhat lane la ha kano kano ka dur ruh ban shngaiñ ka pateng ka ban wan la bynrap shuh shuh u Samla Donald.
Ka KSU kan ym sangeh bad kan iakhun ïa kino kino ki mat kiba ktah mationg ïa ka ri bad ka jiatbynriew bad ruh kan ym ai lad ïa kino kino kiba thmu ban pynpharia jaitbynriew, ban pyn ïa pher thaiñ, niam, hynrei ngin kynmaw ba ngi dei tang kawei ka Jaitbynriew Khasi .
Ha kane ka jing pynskhem la pynlong ha ka shnong Kynroh ha kaba la pyniaid ïa ka jingialang da u Samla Sonstar Nongkhlaw, Asst Finance Secretary KSU CEC ha kaba la don ryngkat bad la ioh ruh ki jingkren na Samla Ian Gilmore Nonghuloo Excutive Member KSU Sengkmie, Samla Meaning Pathaw President Nongthliew Circle, Samla Pynshaiborlang Rani Publicity Secretary KSU Sengkmie bad Samla Shemphang L. Mawphlang Litigation Secretary KSU Sengkmie.
Ha kane ka jingpyntian smai ia ki nongkit kam ka KSU Kynroh Unit la jied ia u samla Spading Mawlong kum u President, Diweljon Mawlong kum u General secretary , u Wadlang Mawlong kum u Organising Secretary bad u Sarwet Mawlong kum u nongai ktien ka seng, u Skeding Mawlong sport secretary bad u Rijop Ryntathiang education secretary bad 16 ngut kiwei ki dkhot ka seng.
