Shillong, Risaw 25: Mynta ka sngi ka Raid Mylliem kaba dei ka thymmei jong ka Hima Mylliem kala ioh ia ka iing dorbar ha dien 169 snem naduh ba ki phareng kila phiah ia ka Hima Shyllong ha ki ar tylli ki Hima ka Hima Mylliem bad ka Hima Khyriem.
Ia kane ka iing dorbar la plie mynta ka sngi da u myntri ka tnad pynroi nongkyndong u bah Hamletson Dohlieng ha ka ka jingiadon lang u bah Titosstarwell Chyne Chief Executive Member jong ka KHADC.
Ha ka jingkren u bah Hamletson Dohling kum u kongsan ha kane ka sngi u la ong ba ka Hima Mylliem, ka KHADC bad ka Sorkar kila ia treilang ban wat ia ki lat ki lynti ban pynkynriah ia ki kharmetor na them Iew Mawlong dei da ka jingiatrei lang jong ki ba la lah ban pynbeit ban pynkynriah ia ki na katei ka jaka.
Ban shu ong ban pynkynriah ka dei kaba suk, hynrei ban peit ban iiet bniah namar katei ka jaka ki don kiba hap ha ka Hima Mylliem, don ki jaka ba dei jong ka sorkar da ka jingshem ia ki kot ki sla ha kaba mynta la shimti da ka sorkar bad la siew ia ka tei ka jaka T.2.087 klur sha ka Hima Mylliem.
Mynta ka dei ka jaka ka dei jong ka sorkar bad mynta ap sa tang ia ka bor ban pynkynriah noh ia kitei ki briew na katei ka jaka ka jingkhublei kaba kyrpang kaleit sha ka Hima Mylliem bad ka KHADC bad kane ka jingiadon lang ym lah ban pynurlong ia ka jingangnud jong ki paidbah.
Ha ka jingkren u bah Titosstarwell Chyne CEM jong ka KHADC u la ong ba na la liang jong ka District ka thrang ban iohi ba baroh ki hima ki dei ban don ia ki nongsynshar ba pura bad na ka liang jong ka KHADC kan ialeh ban pynioh ia u syiem ba pura ha shwa ban kut une u snem 2022.
Haba ia dei bad ka dorkhas kaba la ai na ka liang jong ka hima ban pynbha ia ka Iew Rim Mylliem kaba don ha Mylliem kaba dei ka pnia jong ka jong ka hima la ong ba yn sa peit kaei kaba u lah ban iarap na ka Tribal Tourism, u la ia khublei ia ka Raid Mylliem kaba la iohia kane ka iing dorbar kaba la plie mynta ka sngi.
Ha ka jingkren u Syiem ba shipor jong ka Hima u Pa,im Ainam Manik Syiem la ong ba naduh bala phiah iaka Hima Shyllong ha u snem 1853 ha ki ar tylli ki hima ka Hima Mylliem bad Hima Khyriem kane ka Riad Mylliem ha dien 169 snem kala ioh mynta ka sngi ia ka iing dorbar raid.
U Myntri M Kharlukhi u la batai ia ka khana pateng haba ia dei bad katei ka jaka, la ong ba haduh mynta u syiem jong ka hima Mylliem ha dien ba u la shah jied, ia ka jingpynithuh syiem u sdang na kane ka Iew Mylliem kaba hap hapoh ka Riad Mylliem bad ia ki jinglehniam ka hima ka sdang na kane ka jaka.
Ia ka jingialang la pyniaid da u myntri Sohtun bad ha kane ka sngi la iohruh ia ki jingkren na u rangbah shnong Mylliem, rangbah raid Nongkseh, Rait Laban bad kila don ruh ki jingrwai ban pynphun pynphing ia kane ka sngi plie ia kane ka iing dorbar kaba don la ka niam ka rukom.
