Shillong, Iaiong 24: Halor ka dorkhas kaba ka seng HYC kala dep ban leit ai sha u Myntri Rangbah ka jylla u Conrad K Sangma halor ki jingdawa kiba ka seng kala buh ha khmat jong ka sorkar ban pyntrei kam, mynta ka sngi na ka liang jong ki nongialam kila leit ban ia kynduh ia u myntri ba dei peit ia ka kam sam um ha ka jylla Meghalaya u Bah Samlin Malngniang.
Haba kren ha ki nongthoh khubor ha dien ka jingiakynduh u myntri ka tnad sam um jong ka jylla, u Bah Robertjune Kharjahrim, u la ong ba kane ka jingiakynduh ia u myntri jong ka sorkar u Bah Samlin mynta ka sngi ka long ba ka seng ka don kam ia ka jingkyrshan jong ki myntri lada ka sorkar kam shim ia ka rai ban pyntrei kam. Kane ka long ka jingsdang bad kin dang ia kynduh ia kiwei ki myntri sorkar halor kane ka juh ka phang.
Ka dorkhas kaba seng kala ai sha u myntri ka tnad sam um jong ka jylla ka dei ka juh kaba ki la ai sha u myntri rangbah ka jylla bad kita ki mat ki long ban iada na ka jingwantuid jong ki briew na sha bar, na ka liang jong ka seng kala pynshai ba ka jingiada kam dei eh tang ia ki briew kiba wan na sha bar jong ka Ri, hynrei wat ia kiba na poh ka Ri bad kum juh ia ka jingwan tuid jong kiwei ki para riewlum na kiwei ki jylla.
Ka seng kala ia kren bha bad pynsngewthuh ia u myntri ka sorkar jylla ha kaba ia dei bad ka jingkhanglad ia ka jingiakhaii benami, ka seng HYC ka ong ba kumba ka long mynta ka jingkhanglad jong ka benami ka long lada u riewlum u shim pisa na ki byndei riew lum ban ia khaii, hynrei dei ban khang wat hapdeng ki riewlum namar kimd ei na kane ka jylla.
Kawei ka phang kaba kongsan ba ka seng kala ban jur ka long ba ka sorkar ka dei ban wanrah ia ka ain kaba yn tip kum ka “Right to service Act” ka jingmut ka long ba ki paidbah haba ki don kam ban ioh ia kano kano ka jingthoh na ka sorkar kum ia ka Schedule Tribe Certificate, Birth Certificate bad kiwei kiwei ki kot ki sla kiba dei ban ioh na ka sorkar ka dei ban don da ka por, hynrei kumba ka long mynta ki paidbah ki ia kynduh jingeh namar bun sien palat bnai ruh kim ioh.
U Bah Robertjune Kharjahrin General Secretary jong ka seng u la ong ba ka seng kan dang iakynduh shuh ia kiwei kiwei ki myntri sorkar de halor jong kane ka bynta ban pan ka jingkyrshan na ki bad ban pynsngewthuh ia kaei kaba ka seng ka thrang ba ka sorkar ka dei ban leh ban iada ia ka jingwan tuid kyrthep ki briew na sha bar ka jylla sa kane ka jylla.
