Shillong, Nailur 21: Ka seng ki Synjuk ki Rangbah Shnong (SRS) mynta ka sngi kila leit ban ia kynduh ia u Chief Executive Member jong ka Khasi Hills Autonomous District Council (KHADC) u Bah PN Syiem ban pynsngew ha u ia kaei kaba kila ia kren bad u myntri rangbah ka jylla u Dr Mukul Sangma ha kaba ia dei bad ka Village Administration Bill kaba la sah teng mynta la slem.
U Dr Werlok Kharshiing chairman jong ka synjuk, la iathuh ba ha kane ka jingiakynduh ia u CEM jong ka KHADC, kila ia kren halor ka phang ba ka VAB kala sah teng mynta la slem bad kum ka synjuk ki kwah ban pynkloi noh ba kane ka VAB kan long ain noh.
Ka synjuk kala twad jingmut ruh na u CEM, haei kala poi, ha kaba ia dei bad ka jubab kaba ka KHADC kala ai, ia ki jingkylli kiba ka Ministry Home Affair (MHA) kala pan jingpynshai, halor kane ka SRS ka kyntu ia u CEM ban bud dien la ka dei bad ka sorkar jylla lane bad ka MHA.
Haba ia dei bad ka jingai jingmut jong u Dr Mukul ba kan bha ba ka KHADC kan khot biang noh ia ka VAB, na ka liang jong ka synjuk kala pynsngew ia kane ha u CEM jong ka KHADC. Ka jingangnud jong ka synjuk ka long ba ki kwah ban ioh ia ka VAB.
Ha kane ka jingiakren na ka liang jong u CEM jong ka KHADC u Bah PN Syiem ym shym la ai kano kano ka kular ia ki SRS, hynrei u la ong ba ia kane ka kam yn hap ban ia kren bad baroh ki MDC namar kane ka kam ka dei ka kam jong ka iing dorbar, la iathuh u Dr Kharshiing.
