Shillong, Naitung 16: Wat la hapdeng ka jingjur jong u slap ki paidbah jong ka thain South West Khasi Hills kila ia poi da ki spah ngut ki birew ban ia shim bynta ha ka jingialang paidbah kaba la khot da ka JACSO jong ka South West Khasi Hills District ban pyrshah ia ka jingtih Uranium ha katei ka thain.
Ha ka jingkren jong u Chairman jong ka JACSO, u Bah Wallambok Syiemiong , lyngba kane ka jingialang paidbah, ka khubor kaba leit sha u myntri rangbah ka jylla ka long ba lada ka don ka jingtih Uranium da ka UCIL sha Garo Hills ruh kin pyrshah namar kim kwah ba ki para doh para snam Garo kin ngat ha ki jingpang na ka jingtih Uranium.
Kane ka jingialang paidbah kaba la long mynta ka sngi kala shim ia ka rai, ban dawa na ka sorkar ba ka dei ban shnong noh ia ka surok, “single lane” na Nongstoin sha Ranikor, ia ki shnong baroh ha katei ka thain dei ban ai surok bad siang rongnoh khlem da ia pein bad u Uranium.
Ka UCIL ka dei ban khang tala noh ia kane ka jingthmu tih Uranium, namar kane ka jaka ka dei ka jaka ba jur slap tam bad ha ka juh ka por ka dei ka jaka ba don jumai bad kane kan buh jingma lada jia ei ei ia ki paidbahkumta ka bha ia ka UCIL ba kan khangtala noh.
Haba ka sorkar ka sngewkhia ia ka jingsah dien ka thain, ka sorkar kala dei ban plienoh ia ka ophis jong ka tand pynroi nongkynong ia kaba la tip kum ka Block ha katei ka jaka ba don Uranium na ka bynta ka roi ka par jong ki paidbah katei ka thain.
Kiwei kiba la kren ha kane ka jingialang ki long u General secretary jong ka JACSO u Bah Robert J Kharjahrin, u Bah Poling Lyngdoh chairman ka SSSS bad bun kiwei ki nongialam seng bhalang bad kine baroh ha ka jingkren ka jong ki kila pynpaw ba kane ka jingtih Uranium ka ktah ia ka koit ka khiah jong ki paidbah dei na kane ka daw ba ki sa ieng ban ialeh pyrshah.
