Shillong, Iaiong 10: Dang shen ka iing bishar ba don burom ka High Court jong ka Meghalaya, ha ka jingbishar ba dang shen, ka la hukum ia ka sorkar ban siew T. 40,000/- (sawphew hajar tyngka) ia u draibar taksi ba shah shoh ha ki pulit ha Madanrting Police Station. Kum ban shu pynkynmaw, ha ka 9 tarik September, 2011 u Bah Balawan Pala u la shah rah sha katei ka Thanat bad shah shoh khlem jingisynei tang namar ba u khlem lah ai pass ia u R. R. Pde ha Laitumkhrah uba niah bike bad uba dei u Constable ha Madanrting Police Station.
U MDC jong ka Nongthymrnai, u Bah Latiplang Kharkongor, u la sakhi ia kane ka jingjia bad u la pynsangeh ia ki pulit na kaban shoh bein shuh shuh. U Bah Latiplang Kharkongor u la wan sha I<a thanat namar ba u Bah Balawan Pala u la phone ia u
ha ka por ba dang ialam ia u sha Thanat ha ka taksi jong u. Ha ka janmiet jong ka juh ka sngi, ki ba haing bad katto katne ki riew rangbah ki la leit ai ka jingujor da ka ejahar pyrshah ia u R. R. Pde.
Arsngi hadien, utei u pulit u la ai kylla ka ejahar pyrshah ia u Bah Balawan Pala da kaba kynnoh ba u dei u Bah Balawan uba shoh ia u. U Bah Balawan u la leit ud leit nam ha ka High Court shaphang kane ka jingleh donbor jong ki pulit da kaba file da ka writ petition bad ka Kong N. G. Shylla, Advocate ka la mih khmat ia u. Ha ka 21.03.2014 u nongbishar, u Mr. Justice T. N. K. Singh, u la ai ia ka jingbishar.
U la ong ba ka jingsiew ne jingburia da ka pisa, ka long kum ka jingpynbiang na ka bynta ka jingiuhroit ia ka hok longbriew manbriew bad la pynthikna ba ka don shisha ka jingiuhroit ia ka hok tynrai jong u Bah Balawan kaba la ai da ka Constitution jong ka ri India.
Ka jingburia da ka pisa ka don ka bynta ha ka ain. I(a long ka nuksa ia kiwei namar ki ain ki kanun ki dei ruh ban ai ka jingsngewskhem ia ki nongshong shnong ba ki im ha ka jingsynshar kaba don ki ain kiba iada ia ki hok jong ki.
Ka jingialeh jong u Bah Balawan ban ioh ia ka hok kam pat kut. Tang hapoh lai bnai, ki pulit ki la dep chargesheet ia u halor ka ejahar ba ai u Pde pyrshah ia u. Ka mukotduma ka dang don hapoh ka jingbishar jong ka District and Sessions Court, East Khasi Hills District. Katba ia ka ejahar pyrshah ia utei u pulit pat, ki pulit kim pat dep chargesheet haduh mynta.(SP News)
