Shillong, Jylliew 06: Ka Society for Promotion of Indigenous Knowledge and Practice (SPIKAP), hapoh ka shatri jong ka UNDP ka la pynlong ia ka jingia lum lang ban ia kren bad ban thung dieng ha ka Law Kyntang Lum Umthli, Raid Diengsaw, ha kaba hynniew tylli ki skul kila wan ban ia shim bynta.
Ka Phong Presbyterian LP SSA School,Nongtraw RCLP School, Mawtuli LP SSA School, Kshiad Presbyterian UP School, Kshaid Presbyterian LP School, War War St. Mary’s RCLP School bad Rangpajun RCLP School, kiba hap ha ka thain Khatar Shnong, hapoh ka Raid Diengsaw Hima Sohra.
La ia shim bynta haduh 144 ngut ki khynnah skul ha ryngkat ki nonghikai kiba la ia shim bynta ban pynlong ia ka jingiakren bad ka jingthung dieng tynrai ha Lum Umthli, Raid Diengsaw, Hima Sohra. Ka la long ka sien nyngkong ha kaba ki khynnah skul, nonghikai ki la wanrah hi ia ki tynrai dieng na jaka la jong bad ban kiew ia u lum jan ar km ban kiew sha Lum Umthli bad ban thung ia ki dieng tynrai kiba na kato ka thain.
U Chairman (SPIKAP) Bah John F Kharshiing, haba ai jingkren u la ong ba ka pyrthei baroh kawei ka don ha ka jingia kren kaba jur bha halor ka jinglong ka Mei-ram-ew bad u bynriew un hap ban pyrkhat sani bha halor kumno u im bad ka Mariang bad kawei na kita ka long ban pyntikna ba ki Law Kyntang, ki Law Adong, ki Law Kur, Ki Law Raid, Law Hima, ba kin neh kin sah bad u la ong ba kum ka jaidbynriew Khasi, Jaintia bad Garo ngi long kiba donbok namar ki longshuwa ki la sain dur ia ka lawei ha ka nongrim kaba skhem da kaba buh ia kitei ki khlaw kiba kyrpang na ka bynta jong ngi ki longdien bad kadei ka kam ram ka jong ngi ban pyrshang ban sumar bad ban aiti pat sha ki pateng kiban sa wan.
Ha kane ka bynta u Bah John F Kharshiing, Chairman, SPIKAP, bad Co-Chairman, MSPB, u la ong ba ka long kaba donkam bha ban buh thup ia ki khana tang jong kitei ki Khlaw kiba kyrpang. Kiba la ia don lang ki long u Bah Klit Diengdoh, Sordar Raid Diengsaw, u Bah Phiel Diengdoh, Secretary, Raid Diengsaw, bad u Bah Kodin Nongrum, Myntri Hima Sohra Syiemship. Ha katei ka sngi la sam ia ki jingthoh ki jingtip shaphang ka Law Kyntang Hima Mawphlang, Ka Law Kyntang Hima Lyngiong bad ka Law Kyntang Lyngdoh Nongkrem.
