Shillong, Nailur16: Haka jingiatreilang jong ki pulit ka jylla Meghalaya bad kipulit jong ka jylla Assam la ioh ban pynlait ia u Arabindra Kr Das, ba la 77 snem ka rta na Ramkrishna Nagar, Karimganj hapoh ka jylla Assam.
U Superintendent jong ki pulit (City) u Bah Vivek Syiem ha ka jingpynlait khubor mynta ka sngi u la ong ba ha ka 26 tarik jongu Naitung mynta u snem ka Sunita Das kala ai ia ka jingujor sha ki pulit ba u kurim jong ka u Arabindra Kr Das, ba la 77 snem ka rta ha dien ba u la mih na iing kumba san baje mynstep ban leit kai step ym shym wan phai shuh sha iing na duh ka 25 tarik jong u tei u bnai.
Ha kane ka jingujor la ong ba ha katei ka juh ka sngi ha ka por 7.15 baje jan miet, ka khun jong ka kaba sah ha Pune kala pyntip ba u kpa jong ka u la shah rah bor bad ki nongrah bor kila dawa pisa ar klur tyngka.
Ki pulit kila register ia kane ka jingujor bad ka Sardar police station, na ka daw ba kane ka jingjia ka long kaba hap ban da phikir bha n aka liang jong ki pulit ruh kim shym la pyntip sha ki lad pathai khubor namar ki ting ioh jia ei ei ia ka jingim ka jong une u ba shah rah bor.
Haba ia dei bad kane ki pulit jong ka jylla bad ki pulit ka jylla Assam kila ia treilang ban thwet ia kine ki nongrah bor dei ha ka 15 tarik mynta u bnai, kila ioh ban bat ia ka kali Maruti Van ha Ramakrishna Nagar, Karimganj hapoh ka jylla Assam bad la ioh ban pynlait ia u tei u ba shah rah bor.
Ki pulit kila ioh ban kem ia u Nurul Haque jong ka Gamari, Ramkrishna Nagar, Karimganj u ba don lang bad u tei u ba shah rah bor. Ki pulit kila ong ba kila lah ban leh ia kane ka kam ban pynlait im ia u Das dei na ka jingiatreilang jong kiba ha iing ha sem, ka jingtohkit ka dang iaid ban ioh kem ia kiba don kti hakane ka kam rah bor.
