Tura, Jylliew 02: Ka jingkhot pakhang shnong da ki seng bhalang ha Garo Hills kaba 12 kynta kaba la long mynta ka sngi kala iaid beit khlem da don kano kano ka jingjia kaba sngewsih.
Ia kane ka jingkhot ia kane ka pakhang shnong la lam khmat da ka seng samla pule GSU bad ka NESU ban pyrshah ia ka jingiap jong ki ar ngut ki samla ha kti jong ka ain, Balsan Marak bad u Witson M. Sangma. Kine ki seng samla pule ki dawa ba dei ban phah tohkit da ka CBI ban lap ia ka jingshisha.
U Balsan u la khlad hapoh ka jaka ai jingsumar jong ka sorkar ha ka 20 tarik jong u bnai Jymmang halor ka jingkynnoh ba u dei u wei na kiba la don kti ha kaba pynmynsaw ia ki khynthei bad I u Witson u la khlad ha kti ki pulit ha Chokpot halor ka jingkynnoh ba u dei u nongiarap jong ka seng lehnoh GNLA.
U Deputy Commissioner jong ka West Garo Hills u Pravin Bakshi u la ong ba “Magistrates bad ki heh sorkar ki don ha ka kam katba kiwei ki ophis sorkar ki duna bha kiba poi sha ka jingtrei.
U president ka GSU, u Tengsak Momin u la ong ba kim dang pynjur ia ka jingiakhih ka jong ki lada ka sorkar kam ai ti ia kane ka jingthohkit ha ka CBI lane ban phah tohkit da ka judicial probe . La ong ba kim don jingshaniah ha ka jingphah tohkit jong ka sorkar.
U wei na ki nongialam jong ka seng FKJGP na Garo Hills u Pritam
Marak u la ong ba ki pynpaw ia ka jingsngew nguh ia ki paidbah kiba la ai kane ka jingkyrshan bad la ong ba kin dang ia bteng ia kane ka jingiakhih ka jong ki haduh bakin da ioh ia kaei kaba ki dawa.
Kumba ka long mynta na ka liang jong ka sorkar ka la thung ia ka kynhun tohkit ha kaba ia dei bad kine ki ar tylli ki jingjia hynrei kim don ka jingshaniah ha kane ka jingtohkit jong ka sorkar.(SP News)
