Shillong, Rymphang 15: U Chief Executive Member jong ka KHasi Hills Autonomous District Council u Bah PN Syiem la khot ia ka jingialang ia ki seng bhalang bapher bapher, kiba kyntup ia ka KSU, FKJGP, HYC bad RBYF ban ia mir jingmut ha kaba ia dei bad ka kam lynti rel na Byrnihat sha Shillong.
Ha kane ka jingiakren bad u CEM na ka liang jong ki nongialam jong ki seng bhalang bapher bapher kiba la ia poi ha kane ka sngi, kila kren shai kdar ba ka KHADC kam pat dei ban ai No Objection Certificate na ka bynta kane ka kam lynti rel katba kim pat don ki lad jingiada kiba biang na ka jingwan rung kyrthep jong ki briew kiba na bar.
Na ka liang jong u Bah PN Syiem u la kular ia ki nongialam jong ki seng bhalang ba un skhim khia ia kane ka kam bad halor kane ka juh ka phang yn sa khot ia ka jingialang jong ki rangbah shnong bad kum juh ia ki trai jaka kaba kane ka lynti rel kan dei ban iaid.
