Shillong, Iaiong 19: Ka Khasi Students’ Union South West Khasi Hills District hapoh ka jingïalam u Samla Marconi Thongni, President Ranikor Circle bad u ba dei ruh u finance secretary jong ka SWKHD,ha ka lah sngi u Blei mynta ka taiew ka leit ai jingïarap da ki tin sop iing sha ki lanot kiba la ngat ha ka jingshah pynjulor ha ki bor jong ka mariang.
U Samla Marconi haba aiti ïa ki tin sop iing u la ong watla ka seng kam lah ban ai pynbiang lut sha baroh ki longiing hynrei ka seng katba lah la i bor iba rit kan sa shim ki lad ki lynti khang ba baroh kin ïa ïoh lut. Ki lanot ki la ai khublei ïa ka KSU kaba la kner la ki jong ki kti ban ai jingïarap hapdeng ba ki paidbah ki mad ïa ki jngeh.
Kum ban shu pynkynmaw kane ka jinglyngshop phria ka la jia ha ki thaiñ Ranikor kiba kynthup ïa ka shnong Balat, Phodkroh bad kiwei kiwei ki jaka kiba marjan ha ka step 2 tarik mynta u bai ha ka por ba ki paidbah ki dang ïoh thiah lyngngai.
Ki paidbah kiba la ngat ha ka apot shah lyngshop ha u phria, ha Ranikor C&RD Block, South West Khasi Hills District ki la kyntait ïa ka jingkam jong ki nongïalam jong ka Ranikor Block Congress Committee (RBCC) ba ki la sam lut sha baroh ki jingïarap sha kitei ki lanot.
Ki ong ba kane ka jingkam ki nongïalam ka RBCC dangshen ba ladep sam lut sha baroh 2300 hajar tylli ki longiing kiba la ngat ha katei ka apot ïa ki jngïarap lyngba ki tin sop iing bad kiwei kiwei ki tiar ka la pynbitar ïa ki paidbah kiba haduh mynta ki don napdeng ki longiing ki bym shym la ïoh wat tang ban thied ïa ki tarpaulin ban tap ïa ki iing kiba la shah lied ha ka eriong.
Kila pynpaw ia ka jingsngew lyngngoh halor ka jingkam jong ki nongïalam ka RBCC ba ki ladep ai jingiarap hynrei haduh mynta ngim shym pat la ïoh eiei bad kane ka dei tang ka buit ban pynïakhlad hapdeng jong ngi ki paidbah. La ong ba u MLA jong ki u Martin M Danggo, ha ka jaka ba un leit da lade u phah ia ki nongbud jong u.
