New Delhi, Iaiong 05: U Myntri Sorkar Pdeng ba dei khmih ia ka Tnat Information & Broadcasting u Anurag Thakur mynta ka sngi u la pynbna ka jingiatreilang hapdeng ka Tnat Information & Broadcasting bad ka Amazon India ha ka Media, Entertainment bad jingai jingtip paidbah.
Haba ai jingkren ha ka jingplie ia ka jingiatreilang, u Anurag Thakur u la ong ba ka India kadei ka ri kaba la hyndai bha ka don da ki million ki khana kiba ym pat juiohsngew.
Ki khana ki iaid na ka pateng sha ka pateng bad ki dei shaphang ka niam, ka software, ka deiriti bad ki kam kiba iaid iew mynta, ki khana pateng bad ki tamasa bad shaphang ki jaka nongkyndong ka India bad ka India ka ba dang kiew shaphrang.
U la bynrap ba dang shen ki prokram na India ki la mad jingjop ha ka rynsan shabar ri bad ki khlurakphlim jong ka ri ki la long kiba pawnam hapdeng ki briew shabar ri.
U Myntri u la peitbniah ia ki sienjam ba la shim da ka Tnat ban wanrah ka jinglong jingman kaba ai mynsiem na ka bynta ki kam pynbyrnia ha India bad ong ba ka Sorkar ka ithuh ia ki bor kumjuh ruh ki lad na ka bynta ki kam pynbyrnia ha India, khamtam ki rynsan ba thymmai kum ki OTT.
Ka Tnat ka la ithuh ia ki kam audio visual kum ka Champion Services Sector bad dang shen ka la wanrah ia ka jingpeit dalade ia ki kyndon kiba iadei bad ki prokram OTT.
Haba kren shaphang ka jingiatreilang bad ka Amazon, u Thakur u la ong ba ka jingiatreilang bad ka Amazon India kadei kaba kham pher namar ki daw bapher bapher bad ba ka Letter of Engagement ka peit ia ki bynta bapher bapher jong ki kam saindur.
Ka jingiatreilang kan iarap ban pynkhlain ia ki jingiadei hapdeng ki kam shna phlim bad ki jaka ai jinghikai lyngba ki kyndon na ka bynta ki scholarship, internship, ki masterclass, bad kiwei kiwei ki lad na ka bynta ki samla pule jong ka Film and Television Institute of India bad Satyajit Ray Film bad Television Institute of India.
Ka sienjam kan iarap ban pynduna ka por jynjar jong ki riewdonsap kiba mih na ki jaka ai jinghikai ha ki kam shna phlim ka India, u la bynrap.
U Myntri u la pynpaw ruh ka jngsngewkhia jong u na ka bynta ka jinglong jong ka prokram ha ki rynsan OTT da kaba ong ba ki rynsan OTT ki don ka jingkitkhlieh ban pynthikna ba ki rynsan jong ki kimpynsaphriang ia ka jingsniew bad ka jingiada ia kane kum ka jingsaindur. Ki OTT kidei ban pyni ia ka jingsngew kyllum jong ka ri, u la ong shuh shuh.
U Symbud Kongsan ha ka jingialang, u VarunDhawan u la kren shaphang ka jingpur ki kam streaming bad ong ba ka Indian cinema lyngba ka streaming mynta ka la poi sha ka rynsan jong ka pyrthei bad ki jingai jingshakri streaming mynta ki la plié lad ia ki prokram na ka India ba kin poi sha ki jaka bym pat ju poi mynshuwa.
U Dhawan u la ban ba ka streaming services act kalong kum ka jingpynryntih bad ong ba “ki actor ba thymmai bad ki nongsaindur, ki sap kiba la shah iehdien la slem mynta ki lah ban iasoh bad ki briew kylleng ka pyrthei.”
Haba kren shaphang ka jingiatreilang, u Dhawan u la ong ba “ka jingiatreilang kaba kum kane kaba kyntiew bad kyrshan ia ki kam jong ngi bad ki sap ka pyndap jingkyrmen ia nga bad iarap ia ngi baroh ban trei na ka bynta ka jingpynkylla ia ka jingmut ban long u nong India ha ki kam shna phlim ha kylleng ka pyrthei.”
U Secretary, Tnat I&B, u Apoorva Chandra u la ong ba ka jingiatreilang hapdeng ka MIB bad Amazon kanplie lad ia ki riewdonsap jong ka ri ha ka ri bad shabar ri ruh kumjuh.
U Vice President, Asia Pacific, Amazon Prime Video, u Gaurav Gandhi u la ong ba “ka jingiatreilang jong ngi bad ka Tnat I&B ka peit ia man ka bynta jong ka jingim bad man ki kyndongkynshrot jong ka jingiasohlang ban pynshlur ka jingkiew ki kam pynbyrnia bad ngi ngeit skhem shaphang ki lad ba kan plié.”
Kiwei pat kiba la iadonlang ha ka jingialang kilong u ChetanKrishnaswamy, Vice President, Public Policy ha Amazon India, u VikramSahay, Joint Secretary, Tnat I&B bad kiwei kiwei ki heh ophisar jong ka Tnat.
