Nongpoh, Naitung 03:Ka Meghalaya Energy Corporation Ltd (MeECL) lyngba u Bah W Diengdoh, CEO ka Umiam Western Circle) ka la buh ka wei ka jaka ban siew bai bording ha ka Shnong Nongthymmai jong ka Raid Madan Kyrdem, Ri-Bhoi district na ka bynta ki paidbah kiba shong ha ka tei ka thain kin ioh ban siew ha katei ka jaka.
U Bah Amberlight Masharing, secretary katei ka Raid haba iakren bad u nongthoh khubor, u la ong ba ka Raid hi baroh kawei ka pdiang sngewbha ia ka jingwanrah ka tnat bording (MeECL) ia ka jaka ban siew bai light ha katei ka jaka.
U la ong ruh ba katei ka jingwanrah jong katei ka tnat bording kan iarap shibun eh ia ki paidbah na ki shnong kiba hap hapoh katei ka Raid, namar baroh shi katta ki hap ban leit siew ia ka bai bording man
la u bnai nalor ba jngai ka lynti, kin hap ban lut da ki katto katne tyngka bad kaba ktah ruh ia ka bainong sngi jong ki, hynrei mynta ki paidbah ki la laitluid bad ki lah ban siew tang ha katei ka jaka ba la
buh kaba jan tam na ki shnong ba ki shong ki sah khlem da donkam shuh ban lut ka por bad ka pisa tyngka.
U la ong ruh ba katei ka jaka siew bai light kan long beit ar sien ha ka shi bnai bad mynta u bnai kaba long ka jingsdang ia katei ka kam, la pynbeit ba kan long ha ka 5 tarik Naitung bad 19 tarik Naitung bad
la kyrpad ba ki paidbah kin ai jingiatreilang na ka bynta kane, khnang ba katei ka kam kan long kaba iaid beit iaid ryntih na ka bynta ka jingmyntoi jong ki ha kiba bun ki liang katkum ka jingangnud kaba
baroh shi katta.(SP News)
