Umsning, Ïaïong 05: Ka ophis jong ka District Election Officer, Ri-Bhoi district hynne ka sngi ki la pynlong ia ka jinghikai sha ki paidbah kiba ym pat tip kumno ban thep vote bad kumjuh ruh sha kito kiba la ju mlien ban thep vote ba mynta u snem, ki bor elekshon ki la pynbeit ban don sa kawei pat ka vote na ka bynta kito ki bym kwah ban vote sha ki phra ngut ki kyrtong na ka 1- Shillong Parliamentary Constituency.
Ia kane ka jinghikai la pynlong hynne ka sngi ha madan Umsning, syndah bad ka surok bah.
Nalor ki phra ngut ki kyrtong, dang don sa kawei pat ka vote kaba ki paidbah ki lah ban ñion, kata ia u NOTA uba dei u budam ba khyndai ha katei ka kor thep vote (EVM), lada ki paidbah kim mon ban jied wat iwei ruh na kitei ki phra ngut ki kyrtong na ka Shillong
Seat.
Ia katei ka jinghikai, la wan ai jinghikai da u Bah A Khongwir, Sector Officer na ka District Election Office ka Ri-Bhoi district, ha kaba nalor ka jinghikai jong u, la don ryngkat ruh u Bah Justine Sun uba long u kaitor ka Rilum Khasi, uba la pynsngew ia ki sur jingrwai ban ialap pynsngewthuh sha ki paidbah kumno ban thep ia ki vote jong ki ha ka 9 tarik mynta u bnai.(SP News)
